जोशीको उम्मेदवारी कायम राखी निर्वाचन गर्नुपर्ने आईसीसी सचिवालयको ठहर
प्रकाशित मिति : श्रावण २४, २०७४ मंगलबार
एनआरएन आईसीसीको अन्तर्राष्ट्रिय कार्यकारी सचिवालयले गौरीराज जोशीको एनसीसी युएसएको निर्वाचन आयोगमा रितपूर्वक आवश्यक कागजात पेश गरी तोकिएको मितिमा अध्यक्ष पदमा मनोनयन गरेको देखिन आएको भन्दै जोशीको उम्मेदवारी कायम राखी निर्वाचन गर्नुपर्ने ठहर गरेको छ । एनआरएन अमेरिकाको सन्दर्भमा हिजो (अगस्त ७) बसेको एनआरएन आईसीसीको अन्तर्राष्ट्रिय कार्यकारी सचिवालयको बैठकले यस्तो ठहर गरेको हो ।
सन् २००६ को जनवरी २१ देखि न्याक नै एनसीसी युएसएको रुपमा कार्यरत रहेको, गौरीराज जोशी न्याक अथवा एनसीसी युएसएमा सन् २००७ देखि सन् २००९ कार्यकालमा कार्यकारी पदमा काम गरेको र गौरीराज जोशीले एनसीसी युएसएमा एक कार्यकाल काम गरिसकेकाले आईसीसीको विधानको दफा २३ को ११ अनुशार एनसीसी युएसएको अध्यक्ष पदमा उम्मेदवार बन्न योग्य ठहरिने अन्तर्राष्ट्रिय कार्यकारी सचिवालयको बैठकको ठम्याई रहेको छ ।
अगस्त ७ मा बसेको बैठकले जोशीको उम्मेदवारी काम हुनुपर्ने निष्कर्ष निकालेको भन्दै महासचिव बद्री केसीले एनआरएन आईसीसीका तर्फबाट अमेरिका क्षेत्रका लागि रिजनल कोअर्डिनेटर सोनाम लामा र डेपुटी रिजनल कोअर्डिनेटर एसी शेर्पाका नाममा अगस्त ८ मा पत्र लेखेका छन् । सोही पत्र २४ घण्टाभित्र एनआरएन युएसएलाई फरवार्ड गर्न आरसी र डिआरसीलाई अनुरोध समेत गरिएको छ ।