एनआरएन अमेरिका : महिला उम्मेदवार कम


प्रकाशित मिति : श्रावण २३, २०७४ सोमबार

एनआरएन आईसीसीमा अमेरिकाका तर्फबाट प्रतिनिधित्व गर्ने बोर्ड सदस्य र एनआरएन अमेरिकाका अन्य पदाधिकारीहरुका लागि परेको उम्मेदवारीमा महिला उम्मेदवारहरुको संख्या निकै कम रहेको छ ।

आईसीसी बोर्ड सदस्य र एनआरएन अमेरिकाका विभिन्न पदहरुमा ८० जनाको उम्मेदवारी परेको छ, जसमध्ये महिला जम्मा १५ जना रहेका छन् । जसमध्ये ३१ जना निर्वाचित हुनेछन् ।

उम्मेदवारी परेकाहरुमध्ये सबैमहिलाहरु निर्वाचित भएमा पनि कुल निर्वाचित संख्याको पचास प्रतिशतभन्दा कम हुनेछ । तर महिलाको नेतृत्व स्वीकार्न हिच्किचाउने मानसिकताको कारण उम्मेदवारी दिएका महिलाहरुमध्ये सबै निर्वाचित हुने सम्भावना छैन ।

आईसीसीमा प्रतिनिधित्व गर्ने बोर्ड सदस्यमा ८ जना निर्वाचित हुनुपर्नेमा १२ जनाको उम्मेदवारी परेको छ । जसमध्ये महिलाहरु जम्मा तीनजनामात्र रहेका छन् । उनीहरुमध्ये बनिता कतिला यस अगाडिको कार्यकालकी उपाध्यक्ष हुन् भने बन्दना कोइराला २०१५ देखि २०१७ सम्मको कार्यकालकी उपाध्यक्ष हुन् । चर्चित महिला नेतृ गोमा सेनले पनि एनआरएन एनसीसीमा एक कार्यकाल काम गरिसकेकी छिन् ।

त्यस्तै एनआरएन अमेरिकाको अध्यक्ष पदमा चारजना उम्मेदवारहरुमध्ये महिला एकजनामात्र छिन् । उनी हुन् रविना थापा । सन् २०१५ देखि २०१७ सम्मको कार्यकालमा उपाध्यक्षका रुपमा काम गरिसकेकी रविना थापा लोकप्रिय उम्मेदवार हुन् । बाल्टिमोरमा रहेर विभिन्न सामाजिक संस्थामा काम गरेको अनुभव छ उनीसँग ।

त्यस्तै बरिष्ठ उपाध्यक्ष पदमा कुनै पनि महिलाको उम्मेदवारी परेको छैन भने अमेरिकाको मध्यपश्चिमको क्षेत्रीय उपाध्यक्षमा राधा पौडेलको उम्मेदवारी परेको छ । पौडेलसँग पनि सन् २०१५ देखि सन् २०१७ सम्म एनआरएन एनसीसी अमेरिकामा काम गरेको अनुभव छ ।

उत्तरपूर्वको क्षेत्रीय उपाध्यक्षमा कुनै महिलाको उम्मेदवारी परेको छैन । दक्षिणको क्षेत्रीय उपाध्यक्षमा भने एकजना महिला केमिका भण्डारीको उम्मेदवारी परेको छ ।

पश्चिम क्षेत्रीय उपाध्यक्षमा एकजना महिला उमा कार्की थापाको उम्मेदवारी परेको छ भने महासचिव जस्तो महत्वपूर्ण पदमा भने कुनै पनि महिलाको उम्मेदवारी परेको छैन । सचिव, कोषाध्यक्ष र सहकोषाध्यक्ष पदमा पनि महिलाको उम्मेदवारी परेको छैन । महिला संयोजक पदमा स्वभाविक रुपमा इन्दिरा त्रिपाठी र लक्ष्मी खरेलको उम्मेदवारी परेको छ । युवा संयोजक पद निर्विरोध भएपनि महिला संयोजक पद निर्विरोध हुन सकेन ।

बोर्ड सदस्यमा उम्मेदवारी दिनेमा पनि अधिकांश पुरुषहरु छन् । महिलाबाट पुष्पलता भण्डारी, गुन्जना पाण्डे, तृष्णा शर्मा, बिन्दु सापकोटा, दिब्या केसी र संगिता मुखियाको उम्मेदवारी परेको छ ।

उम्मेदवारी दिएका सबै पदमा महिला विजयी भएपनि कुल ३१ पदमा जम्मा १४ जना महिलामात्र निर्वाचित हुनेछन् । जुन पचासप्रतिशतभन्दा कम हो ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com