जलवायु परिवर्तन : पेरिस सम्झौताबाट अमेरिका अलग
प्रकाशित मिति : श्रावण २२, २०७४ आईतबार
श्रावण २२, २०७४- अमेरिकाले जलवायु परिवर्तनसम्बन्धी पेरिस सम्झौताबाट अलग हुने बताएको छ । गत जुनमा अमेरिकी राष्ट्रपति डोनाल्ड ट्रम्पले सम्झौताबाट बाहिरिने निर्णय गरेका थिए । ट्रम्पको निर्णयको चौतर्फी आलोचना भएको थियो । ह्वाइटहाउसले ट्रम्पको निर्णय कार्यान्वयन गर्न लागेको लिखित जानकारी संयुक्त राष्ट्रसंघलाई दिएको हो ।
ट्रम्पले सम्झौताले अमेरिकालाई ‘दण्डित’ गरेको र लाखौं रोजगारी कटौती गर्ने बताएका थिए । उनले देशभित्र ऊर्जा तथा अन्य उद्योगहरूमा क्षति पुग्ने बताएका थिए । अमेरिकी विदेश मन्त्रालयले बहिर्गमनको प्रक्रियाका लागि एक वर्ष लाग्ने जनाउँदै त्यतिन्जेल अमेरिका जलवायु परिवर्तनसम्बन्धी सम्मेलनमा सहभागी हुने बताएको छ । सन् २०१९ को नोभेम्बरअघि सम्झौताबाट अमेरिका औपचारिक रूपमा अलग हुन सक्ने छैन ।
राष्ट्रसंघलाई पठाइएको पत्रमा अमेरिकाले हरितगृह ग्यास उत्सर्जन कम गर्ने लक्ष्यले आफूलाई वर्षौं अर्बौं डलर घाटा पर्ने जनाएको छ । पेरिस सम्झौता परिमार्जन गर्न वार्ताका लागि भने तयार रहेको अमेरिकाले जनाएको छ । २०१५ मा भएको पेरिस सम्झौतामा १ सय ९६ देशले हस्ताक्षर गरेका छन् । गत महिना जर्मनीमा भएको जी–२० सम्मेलनका सहभागी राष्ट्रहरू अमेरिकाको अडानले विभाजित भएका थिए ।