Follow @khasokhasmag

कीर्तिमानी सरुवा नजिक नेयमर


प्रकाशित मिति : श्रावण १९, २०७४ बिहीबार

श्रावण १९, २०७४- ब्राजिली युवा स्टार नेयमर २२ करोड २० लाख युरो (२६ करोड ३० लाख डलर) मा बार्सिलोनाबाट फ्रान्सेली क्लब पेरिस सेन्ट जर्मेन (पीएसजी) सँगको सरुवा नजिक पुगेका छन्। उनी सरुवा प्रक्रियामा रहेको र यसलाई सातापछि ल्याइने उनका एजेन्टले बताए।

नेयमरका सहकर्मी लियोनल मेसीले सामाजिक सन्जालमा ब्राजिलियन खेलाडीलाई बिदाईको सन्देश प्रवाह गरिसकेका छन्। उनका एजेन्ट वाग्नर रिबेइरोले स्पेनिस रेडियोलाई बार्सिलोनाले तोकेको मूल्य पीएसजीले लगाउने र उनका ग्राहक (नेयमर) ले सम्झौता टुंग्याउने प्रक्रियामा रहेको बताए।

‘पीएसजी नेयमर सरुवाका लागि तोकिएको २२ करोड २० लाख युरो तिर्न आज गइरहेको छ। त्यसैले उनलाई सप्ताहन्तमा प्रस्तुत गरिनेछ,’ रिबेइरोले भने, ‘उनीहरू (नेयमर र उनका पिता) अहिले आकाशमा छन्।’ नेयमरको सरुवा नजिकिँदै गर्दा केही दिनयता तनाव देखिएको छ। बार्सिलोनाले बुधबार विज्ञप्तिमार्फत् २५ वर्षीय नेयमरले क्लब छाड्न चाहेको भन्दै स्थानान्तरण रकम तोकेपछि बुधबार सहज भएको थियो।

‘खेलाडी नेयमर जुनियर, उनका पिता र एजेन्टले बार्सिलोना छाड्ने निर्णय गरेको कार्यालयमा भएको बैठकमा सुनाएका छन्,’ बार्सिलोनाले विज्ञप्तिमा भनेको छ, ‘क्लबले उनको बहिर्गमन मूल्य २२ करोड २० लाख युरो सिफारिस गरेको छ।’ यसअघि नेयमरले प्रशिक्षणमा आफू पीएसजी जान लागेको सहकर्मीहरूलाई बताएका थिए। लगत्तै उनले प्रशिक्षण छाडेका थिए।

मेसी र लुइस स्वारेजसँगै खेलेका उनले चार वर्ष क्याटलन क्लबमा बिताए। उनले अक्टोबरमा स्थानान्तरण रकम वृद्धि गर्दै सन् २०२१ सम्मको नयाँ सम्झौता गरेका थिए।

मिडिया स्रोतअनुसार नेयमरले ६ वर्षे सम्झौतालाई साताको ४ लाख ५० हजार युरो तलबका लागि मोलमोलाई गरिरहेका छन्। नेयमर चीनबाट मंगलबारमात्र स्पेन आएका हुन्। उनलाई बार्सिलोनाले ५ करोड ७१ लाख युरोमा २०१३ मा ब्राजिलियन क्लब सान्तोसबाट भित्र्याएको थियो। तर पछि स्थानान्तरण रकम १० करोड युरोनजिक पुगेको रहस्योद्घाटन भएको थियो।

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com