Follow @khasokhasmag

गायक, संगीतकार राइमनद्वारा आत्महत्या


प्रकाशित मिति : श्रावण १८, २०७४ बुधबार

– प्रदीप मेन्याङ्बो

श्रावण १८, २०७४- ‘भाग्यमा नै थिएन होला शायद हाम्रो मिलन’गाएर निकै चर्चित भएका गायक, संगीतकार राइमन राईले आत्महत्या गरेका छन् । अविवाहित उनी धरान–११ सिर्जनाचोकस्थित आफ्नो फुपुको घरमा बस्दै आएकोमा मंगलबार राति १ बजे ढोका थुनेर झुन्डिएको अवस्थामा आफन्तले देखेपछि प्रहरीलाई बोलाइएको थियो । ३८ वर्षीय राईले पाँच दर्जन गीतमा संगीत गरेका छन् । उनले करिब डेढ दशकदेखि गाउँदै, संगीत भर्दै आएका थिए । उनका ‘मनन’ र ‘मिक्स’ एल्बम छन् । करिब एक दर्जन गीतहरुको म्यूजिक भिडियो बनाएका छन् । उनका पुर्ख्यौली घर भोजपुर हो ।

स्थानीय स्कुलमा अस्थायी शिक्षकको रुपमा शिक्षण समेत गर्दै आएका थिए । किरात राई सांस्कृतिक कलाकार संघ सुनसरीका पूर्वअध्यक्ष समेत रहेका राईका भाग्यमा नै थिएन, भाइटीकामा भेट्न आउँदा, मेरो एउटा मुटु थियो चोरी लग्यो लगायत गीत छन् । गायन र संगीतमै जीवन बिताउने भन्दै आएका राईले नयाँ एल्बमको तयारी समेत गरिरहेका थिए ।

उनका नजिकका साथी समेत रहेका किरात राई सांस्कृतिक कलाकार संघ सुनसरीका अध्यक्ष महेन्द्र राईका अनुसार कलाकार राई मानसिक रोगबाट पीडित थिए । उनले आफ्ना साथीहरुलाई ‘मलाई कसैले मार्नका लागि पच्छ्याउँदै छ’ भनेर बारम्बार भन्ने गरेका थिए ।

उनको मानसिक अवस्था नाजुक हुँदै गएपछि साथीहरुले ‘अस्पतालमा गएर मानसिक रोगको उपचार गर्न कर गर्दा आफूलाई केही नभएको’ जिद्दी गर्दै आएका थिए । उनको शव पोस्टमार्टमका लागि बीपी कोइराला स्वास्थ्य विज्ञान प्रतिष्ठानको मर्चरीहाउसमा राखिएको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com