अमेरिकामा १२ देखि १५ बर्षसम्मका बालबालिकाहरुका लागि पनि फाइजरको बुस्टर डोज स्वीकृत
प्रकाशित मिति : पुस १९, २०७८ सोमबार
अमेरिकामा औषधी नियामक एजेन्सी एफडीएले १२ देखि १५ बर्षसम्मका बालबालिकाहरुका लागि कोरोनाबिरुद्धको खोप फाइजरको बुस्टर शट पनि स्वीकृत गरेको छ । बुस्टर शटका लागि कोरोनाबिरुद्धको फाइजर खोपको दोश्रो डोज लगाएको ६ महिनापछि योग्य हुने प्रावधानलाई परिमार्जन गरेर ५ महिनापछि नै योग्य हुने बनाइएको छ ।
त्यस्तै एफडीएले प्रतिरोध क्षमता कमजोर भएका ५ बर्षदेखि ११ बर्ष उमेर समुहका बालबालिकाहरुका लागि पनि फाइजरको तेश्रो डोज स्वीकृत गरेको छ । विद्यालयमा कोरोनाको ओमिक्रोन भेरियन्टको संक्रमण बढ्दो रहेको अवस्थामा एफडीएको पछिल्लो निर्णय आएको हो ।
कोरोना संक्रमणका कारण कर्मचारीहरु क्वारेन्टीनमा बस्नु परेपछि सोमबार कतिपय व्यवसाय र विद्यालयहरु बन्द गरिएका छन् । एफडीएका अधिकारी पिटर माक्र्सले भ्याक्सिनको बुस्टर डोजले कोरोनाको डेल्टा र ओमिक्रोन भेरियन्टबिरुद्ध राम्रो संरक्षण प्रदान गर्न सक्षम हुने बताएका छन् ।
अमेरिकाको सरकारले बुस्टर डोज नलगाएका अमेरिकनहरुलाई बुस्टर डोज लगाउन प्रोत्साहित गरेको छ । न्युयोर्क सिटीले बुस्टर डोज लगाउनेहरुलाई एकसय डलर नगद प्रदान गर्ने कार्यक्रमको समेत घोषणा गरेको थियो । अन्य सिटी र राज्यहरुले पनि यस्ता कार्यक्रमहरुको घोषणा गरेका छन् ।
अमेरिकामा कोरोना संक्रमण एकसातामा दोब्बर भएको छ भने औषत दैनिक संक्रमण दर ४ लाख १८ हजार पुगेको छ । अहिलेसम्म अमेरिकामा जम्मा ६२ प्रतिशतले कोरोनाबिरुद्धको भ्याक्सिनको पूर्ण डोज लगाएका छन् भने त्यसमध्ये एकतिहाईले बुस्टर डोज लगाएका छन् ।
फाइजर र मोडेर्नाजस्ता एमआरएनए भ्याक्सिन लगाएकाहरुमा गरिएको अध्ययन अनुशार दुई डोज लगाएकाहरुमा कोरोनाको ओमिक्रोनबिरुद्ध ३५ प्रतिशत र बुस्टर डोज पनि लगाएकाहरुमा ७५ प्रतिशत प्रभावकारिता देखिएको छ । धेरै बालबालिकाहरुले भ्याक्सिन लगाइसकेपछि एफडीएले ५ देखि ११ बर्षसम्मका बालकालिकाहरुलाई पनि बुस्टर डोजबारे निर्णय गर्नेछ ।