अमेरिकी विदेश मन्त्रालयको फोन इजरायली कम्पनीले बनाएको स्पाइवेयरबाट ह्याक
प्रकाशित मिति : मंसिर १७, २०७८ शुक्रबार
अमेरिकी विदेशमन्त्रालयका कर्मचारीहरुका कम्तीमा ९ वटा आईफोनहरु इजरायली कम्पनीले विकाश गरेको स्पाइवेयरबाट ह्याक गरिएको छ । अमेरिकी विदेश मन्त्रालयका युगाण्डा र पूर्वी अफ्रिकन देशमा कार्यरत कर्मचारीका फोनहरु ह्याक भएको जनाइएको छ ।
विगतमा पनि केही अमेरिकी उच्च अधिकारीहरुका फोनहरु ह्याक गर्ने प्रयास भएका थिए । तर ती प्रयासहरु सफल भए नभएकोबारे भने स्पष्ट छैन । पछिल्लो साइबर आक्रमण कस्ले गरेको हो भन्ने पनि निर्धारण भइसकेको छैन ।
इजरायली कम्पनी एनएसओ ग्रपले विकाश गरेको स्पाइवेयरबाट फोनहरु ह्याक भएपनि एनएसओ ग्रुपले भने आफूले विकाश गरेको टुलबाट फोन ह्याक भएको आफूहरुलाई कुनै जानकारी नभएको जनाएको छ । तर कम्पनीले सम्भावित केही ग्राहकहरुको पहुच रद्द गरेर अनुसन्धान गर्ने जनाएको छ ।
यदि आफूहरुले विकाश गरेको टुलबाट अमेरिकी विदेश मन्त्रालयका कर्मचारीहरुको फोन ह्याक भएको पुष्टी भएको खण्डमा त्यस्ता ग्राहकलाई स्थायी रुपमा खारेज गरेर कानूनी कारवाही चाल्ने इजरायली कम्पनी एनएसओले जनाएको छ । कम्पनीले सम्बन्धि सरकारी अधिकारीसँग पूर्णरुपमा समन्वय गर्ने समेत बताएको छ ।
एनएसओले आफ्ना उत्पादनहरु सरकारी कानून कार्यान्वयन निकायहरु र खुफिया ग्राहकहरुलाईमात्र बेच्दै आएको बताएको छ । उनीहरुलाई सुरक्षा खतराको अनुगमनका लागि यस्ता प्रविधिहरु बेच्दै आएको र आफै प्रत्यक्ष निगरानी र अनुगमनमा सहभागी नहुने कम्पनीको भनाई छ । घटनाबारे युगाण्डामा रहेका अमेरिकी विदेशमन्त्रालयका अधिकारीहरुले केही बताएका छैनन् । त्यस्तै एप्पलले पनि केही भनेको छैन ।