ग्रिनकार्डवाहक र अमेरिकी नागरिक लगायत सबैलाई १ दिन अघिको कोरोना रिपोर्टको नियमको तयारी


प्रकाशित मिति : मंसिर १५, २०७८ बुधबार

अमेरिकामा बाइडेन प्रशासनले अमेरिका प्रवेश गर्ने ग्रिनकार्डवाहक र नागरिक लगायत सबैलाई बढीमा एकदिन कोरोना परीक्षण गरेको नेगेटिभ रिपोर्ट पेश गर्नुपर्ने नियमको तयारी गरेको छ । यस अगाडि ७२ घण्टाभित्र कोरोना परीक्षण गरेको नेगेटिभ रिपोर्ट र भ्याक्सिन लगाएको हुनुपर्ने प्रावधान रहेको थियो । भ्याक्सिन अनिवार्यको नियम भने नोभेम्बरबाटमात्र लागु गरिएको हो ।

अधिकारीहरुले नयाँ नियमबारे छलफल भइरहेको र अन्तिम निर्णय भइनसकेको बताएका छन् । यो नियम कार्यान्वयन गरिएको खण्डमा अमेरिका प्रवेश गर्ने प्राय सबैले बढीमा एकदिन अगाडि स्वाब संकलन गरिएको कोरोना नेगेटिभ रिपोर्टका साथमा भ्याक्सिन लगाएको प्रमाण पेश गरेपछिमात्र अमेरिकाको उडानका लागि बोर्डिङ पास पाउनेछन् ।

कोरोनाको ओमिक्रोन भेरियन्टका कारण अमेरिकाले नयाँ नियमको तयारी गरेको हो । पुनरावलोकन गरिने नियमले स्वाब संकलनको अवधिलाई कम बनाउने सीडीसीका प्रवक्ताले बताएका छन् । यसले कोरोना सम्बन्धि पहिलेदेखि लागु भइरहेका नियमलाई अझ मजबुत बनाउने उनको भनाई छ । अमेरिका आइसकेपछि अमेरिकनलाई अनिवार्य क्वारेन्टीनको नियमबारे भने विचार गरिएको छैन ।

सोमबारदेखि अमेरिकाले दक्षिण अफ्रिका र ७ देशबाट अमेरिका आउनमा प्रतिबन्ध लगाएको छ । यो यात्रा प्रतिबन्ध कहिलेसम्म लागु हुने भन्नेबारे केही बताइएको छैन । राष्ट्रपति जो बाइडेनले आगामी अवस्थामा भर पर्ने बताएका छन् । हरेक साताको अवस्थाको मूल्यांकन गरेर निर्णय लिइने उनले बताएका छन् ।

बिहिबार बाइडेनले चिसो मौषमका लागि कोरोनाबिरुद्ध लड्ने नयाँ रणनीति सार्वजनिक गरेका छन् । जसमा लकडाउन र शटडाउन होइन, भ्याक्सिन अभियान, बुस्टर शट अभियान, परीक्षण तीब्र लगायतका योजनाहरु समेटिएका छन् । बाइडेन प्रशासनले थप प्रतिबन्धहरु नलगाइने संकेत गरेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com