एफडीएका सल्लाहकारबाट कोरोनाबिरुद्धको खानेचक्की प्रयोगको अनुमतिका लागि सिफारिस
प्रकाशित मिति : मंसिर १४, २०७८ मंगलबार
अमेरिकाको खाद्य तथा औषधी प्रशासन एफडीएका सल्लाहकारहरुले कोरोनाबिरुद्धको खानेचक्की मर्कलाई प्रयोगको आपतकालिन स्वीकृतिका लागि अनुमतिको सिफारिस गरेका छन् । सिफारिसका पक्षमा १३ र विपक्षमा १० मत खसेको थियो ।
मोल्न्यूपिरभीरलाई स्वीकृतिका लागि सिफारिस गर्ने सन्दर्भमा सल्लाहकारहरुबीच मत विभाजन भएको छ । सल्लाहकार समितिको सिफारिस अनुशार एफडीएले स्वीकृति प्रदान गरेको खण्डमा कोरोनाबिरुद्धको उपचारका लागि अमेरिकामा स्वीकृति पाउने यो पहिलो खानेचक्की हुनेछ ।
यो चक्की संक्रमण देखिएको पाँच दिनभित्र सेवन गर्नुपर्छ । दिनको दुईपटक चारवटा चक्की ५ दिनसम्म सेवन गर्नुपर्छ । एफडीएका सल्लाहकार समिति सदस्यहरु खासगरी गर्भवती महिलामा चक्कीको सेवनबारे चिन्तित भएका थिए ।
अमेरिकी कम्पनीहरू मर्क, शार्प एन्ड डोम र रिजब्याक बायोथेराप्यूटिक्सले बनाएको मोल्न्यूपिरभीरलाई यूकेको औषधि नियामक निकायले अनुमोदन गरिसकेको छ । यूकेमा कोभिडका हल्कादेखि मध्यमसम्मका लक्षण देखिएका र अवस्था गम्भीर हुन सक्ने एउटा पनि कारक भएका जस्तो कि मोटोपन, वृद्धावस्था, मधुमेह वा मुटुसम्बन्धी रोग भएका मानिसमा मोल्न्यूपिरभीरको प्रयोगका लागि अनुमति दिइएको थियो ।
कोभिडको उपचारमा सुईको रूपमा दिनुको साटो खान मिल्ने विश्वमै यो पहिलो पटक अनुमोदन गरिएको एन्टिभाइरल हो । यूकेले शुरूमा यो वर्षको अन्त्यसम्ममा ४ लाख ८० हजार वटा मोल्न्यूपिरभीर औषधि पाउने गरी खरिद सम्झौता गरिसकेको छ ।
कोरोनाबिरुद्धको खाने चक्कीको उच्च प्रभाकारिता पुष्टी भएपछि उत्पादक कम्पनी फाइजरले पनि आपतकालिन प्रयोगको अनुमतिका लागि अमेरिकाको एफडीएमक्ष आवेदन दिइसकेको छ । यदि एफडीएबाट स्वीकृति प्राप्त भएमा यो चक्की कोरोना संक्रमण भएकाहरुले घरमै मुखबाट यो चक्की सेवन गरेर सिकिस्त हुनबाट बच्न सक्नेछन् ।
क्वीनिकल परीक्षणका क्रममा उच्च जोखिममा रहेका संक्रमितहरुलाई यो चक्की दिंदा अस्पताल भर्ना हुने र ज्यान गुमाउने दरमा ८९ प्रतिशत कमी भएको थियो । संक्रमितहरुलाई लक्षण देखिएको तीनदिनभित्र यो चक्की खान दिइएको थियो ।
फाइजरले एफडीएसमक्ष नोभेम्बर दोश्रो साता आवेदन पेश गरेको थियो । प्याक्सलोभिड नामको यो चक्की एचआईभी संक्रमितहरुलाई रिटोनाभिरसँगै दिइएको थियो । स्वीकृत भएमा कोरोनाबिरुद्धको १५० मिलिग्रामको यो चक्की दिनको दुईपटक खुवाउन सकिनेछ ।
फाइजरले कोरोनाबिरुद्धको चक्की गरिव देशहरुमा उत्पादन गर्न र सस्तोमा बेच्न अनुमति दिने सम्झौता गरेको घोषणा गरिसकेको छ । कम्पनीले घोषणा गरेको सम्झौता अनुशार कोभिड १९ बिरुद्धको उपचारमा धेरैको पहुच त कायम हुनेछ तर सम्झौतामा कोरोनाको चपेटमा परेका कैयन देशलाई भने समावेश गरिएको छैन । सुचीमा नेपाल पनि समावेश रहेको छ । अर्थात् नेपालले कोरोनाबिरुद्धको फाइजरको चक्की सस्तो मूल्यमा प्राप्त गर्न सक्नेछ ।
फाइजरले कोरोनाबिरुद्धको चक्की ९५ देशमा उत्पादन गर्न र सस्तोमा बेच्न अनुमति दिने भएको छ, जसले विश्वको जनसंख्याको झण्डै आधा जनसंख्या समेट्नेछ । कोरोनाबिरुद्धको चक्की उत्पादन गरिरहेको मर्कले पनि यस्तै सममति गरेको थियो ।
मर्क र फाइजरको यो घोषणापछि यी दुई कम्पनीले विकाश गरेका दुई साधारण चक्कीको उत्पादन सहजरुपमा नै विश्वब्यापी हुनेछ । कोरोना संक्रमणपछि तुरुन्तै सेवन गर्नुपर्ने यी चक्कीहरु कोरोनाबाट सिकिस्त हुनबाट बचाउन प्रभावकारी रहेका छन् ।
सहमति अनुशार फाइजरले राष्ट्रसंघको सहयोग प्राप्त गैरनाफामुलक संस्था मेडिसिन पेटेन्ट पुललाई चक्कीको रोयल्टी फ्रि लाइसेन्स दिनेछ । उनीहरुले औषधी उत्पादनका लागि फाइजरको फर्मुला प्राप्त गर्नेछन् । र, ९५ देशहरुमा प्रयोगका लागि सस्तोमा बेच्न सक्नेछन् । अधिकांश देशहरु एसिया र अफ्रिकाका रहेका छन् । मर्कले भने १०५ देशलाई सस्तोमा चक्की उपलब्ध गराउन यस्तो सम्झौता गरेको हो ।
मर्कको सम्झौतामा जस्तै कोरोनाबाट अत्यन्तै प्रभावित ब्राजिल, क्युबा, इराक, लिबिया, जमैका लगायतलाई समावेश गरिएको छैन । यी देशहरुले सिधै फाइजरबाट महँगोमा चक्की किन्नुपर्नेछ । चीन र रसियालाई पनि फाइजर र मेरेक दुबैले सम्झौतामा छुटाएका छन् ।