१८७ बर्षपछि न्युयोर्क सिटी हलबाट हटाइयो अमेरिकाका तेश्रो राष्ट्रपति जेफर्सनको प्रतिमा


प्रकाशित मिति : मंसिर ८, २०७८ बुधबार

अमेरिकाका तेश्रो राष्ट्रपति थोमस जेफर्सनको प्रतिमा न्युयोर्क सिटी हलबाट १८७ बर्षपछि हटाइएको छ । ७ फुट अग्लो उक्त प्रतिमा हटाउन कैयन घण्टा लागेको थियो ।

अमेरिकाका कैयन सिटीहरुले दासतासँग जोडिएका नेताहरुका प्रतिकहरु हटाउने कदम चालिरहेको सन्दर्भमा न्युयोर्क सिटीले पनि उक्त कदम चालेको हो । दासका मालिकका रुपमा जेफर्सनको इतिहास जोडिएको भन्दै न्युयोर्क सिटीको पब्लिक डिजाइन कमिसनले जेफर्सनको प्रतिमा हटाउने एकमतले निर्णय गरेको थियो ।

थोमस जेफर्सन ६ सय जना दासका मालिक रहेको इतिहास रहेको र दासको मालिकको प्रतिमा सिटीहलमा राख्नु उपयुक्त नभएको भन्दै उक्त प्रतिमा हटाइएको हो । काँसको जेफर्सनको प्रतिमा सन् १८३३ मा बनाइएको थियो भने सन् १८३४ मा न्युयोर्कका जनतालाई उपहार दिइएको थियो । सन् १९१५ देखि यो सिटी हलको च्याम्बरमा राखिएको थियो ।

थोमस जेफर्सन अमेरिकाको स्वतन्त्रताको घोषणापत्रका प्राथमिक लेखक हुन् । उनी सन् १८०१ देखि सन् १८०९ सम्म अमेरिकाको राष्ट्रपति भएका थिए । उनले आफ्नो जीवनभरमा ६ सय जना दासहरु राखेको र उनीहरुले जेफर्सन घर तथा बोटबिरुवामा काम गरेका थिए ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com