जो बाइडेन सन् २०२४ को चुनावमा पनि राष्ट्रपतिमा उठ्ने ह्वाइटहाउसबाट पुष्टी
प्रकाशित मिति : मंसिर ७, २०७८ मंगलबार
वर्तमान अमेरिकी राष्ट्रपति जो बाइडेन सन् २०२४ को चुनावमा पनि राष्ट्रपतिमा उठ्ने भएका छन् । बाइडेनको राजनीतिक भविश्यबारे चर्चा भइरहको सन्दर्भमा ह्वाइटहाउसले बाइडेन आगामी चुनावमा उठ्ने पुष्टी गरेको हो ।
७९ बर्षका राष्ट्रपति बाइडेनको पछिल्ला केही महिनामा लोकप्रियतामा कमी आइरहेको सर्वेक्षणले देखाइरहेका छन् । यो अवस्थामा कैयन डेमोक्र्याट्सहरुले बाइडेन अर्को कार्यकालका लागि चुनाव नउठ्ने अनुमान गरिरहेका थिए । ह्वाइट हाउस प्रेस सेक्रेटरी जेन पास्कीले बाइडेनको चुनावमा उठ्ने आशय रहेको बताइन् ।
भर्जिनियाको गभर्नरको चुनावमा रिपब्लिकनले जितेपछि र न्युजर्सीको गभर्नरमा डेमोक्रेटिक उम्मेदबारले झिनो अन्तरलेमात्र चुनाव जितेपछि डेमोक्र्याट्सहरु आगामी राष्ट्रपति चुनावका बारेमा चिन्तित बनेका छन् । बाइडेन एक कार्यकालमात्र राष्ट्रपति हुने हल्ला चलिरहेका बेलामा बाइडेनले आगामी चुनावमा उठ्ने आशय व्यक्त गरेर आगामी चुनावका लागि बाटो खुला गरेका छन् ।
हालैको वासिंटन पोष्ट र एबीसीको सर्वेक्षणमा बाइडेनको स्वीकृति दर जम्मा ४० प्रतिशतमात्र देखिएको थियो । सन् २०२४ को चुनावमा उपराष्ट्रपति कमला ह्यारिस राष्ट्रपतिमा उठ्ने सम्भाव्यताका कारण बाइडेनले उम्मेदवारी नदिनेबारेपनि प्रश्नहरु उठेका थिए । हालै युएसए टुडेको सर्वेक्षणमा कमला ह्यारिसको स्वीकृति दर जम्मा २८ प्रतिशतमात्र रहेको छ ।
बाइडेनको शुक्रबार गरिएको स्वास्थ्य परीक्षणमा उनी राष्ट्रपतिका रुपमा कार्यभार सम्हाल्न स्वास्थ्यका हिसावले योग्य भएको रिपोर्ट चिकित्सकहरुले दिएका थिए । हिड्ने क्रममा हुने असन्तुलन र बोल्ने बेलामा घाँटी सफा गर्ने तथा खोक्ने समस्याबारे पनि चिकित्सकले रिपोर्ट दिएका थिए । उक्त समस्याका लागि थप उपचारको जरुरत नभएको रिपोर्ट सार्वजनिक गरिएको थियो ।
सन् २०२० को नोभेम्बरमा भएको चुनावमा डोनाल्ड ट्रम्पलाई पराजित गर्दा नै बाइडेन सबैभन्दा बढी उमेरमा निर्वाचित हुने अमेरिकी राष्ट्रपति थिए । सन् २०२४ को चुनाव उनको ८२ औं जन्मदिनभन्दा १५ दिन अगाडि हुनेछ ।