एटलान्टा विमानस्थलमा बन्दुक पड्केपछि बन्दुक बोकेर भागेको बन्दुकधारी अझै फरार, प्रहरीबाट तीब्र खोजी
प्रकाशित मिति : मंसिर ५, २०७८ आईतबार
विश्वकै व्यस्त मध्येको एक अमेरिकाको एटलान्टामा रहेको अन्तर्राष्ट्रिय विमानस्थलमा दुर्घटनावश हतियार पड्केपछि हतियारसहित भागेको बन्दुकधारी अझै फरार रहेको प्रहरीले जनाएको छ । प्रहरीले बन्दुक बोकेर भागेको ४२ बर्षीय केनी वेल्सको खोजी गरिरहेको छ ।
बन्दुक पड्काउने र लापरवाहीपूर्ण बन्दुक परिचालन, दोषी अपराधीका हातमा बन्दुक लगायतका अभियोगमा प्रहरीले ती व्यक्तिलाई खोजी गरिरहेको छ । अमेरिकाको विमानस्थलमा सुरक्षाजाँचबाट बन्दुक लैजानु गैरकानूनी रहेको छ ।
शनिबार दिउसो हार्टसफिल्ड ज्याक्सन एटलान्टा अन्तर्राष्ट्रिय विमानस्थलको मुख्य सुरक्षा जाँच नजिकै हतियार पड्कदा विमानस्थल तनावग्रस्त भएको थियो । हतियारबाट कोही पनि घाइते भएनन् तर भागदौडमा तीनजना घाइते भएको र उनीहरुको अवस्था सामान्य रहेको जनाइएको छ ।
केनी वेल्स नामको यात्रुले सुरक्षा जाँच गराइरहदा कसैले उनको झोलामा हतियार रहेको बताएपछि हतियार बाहिर निकाल्न खोज्दा दुर्घटनावश पड्केको थियो । त्यसपछि आएको आवाजले विमानस्थल तनावग्रस्त भएको थियो भने वेल्स हतियार बोकेर विमानस्थलबाट भाग्न सफल भएको जनाइएको छ ।
विमानस्थलमा भएको भागदौडका कारण केहीबेर उडानहरु स्थगित गरिएको थियो । स्थानीय समय अनुशार दिउसो साढे १ बजे उक्त घटना भएको हो ।
थ्यांक्सगिभिङको बेलामा भएको उक्त घटनाले विमानस्थलमा भएका यात्रुहरु कुनै गोलीकाण्डको त्रासले आत्तिएका थिए । शुक्रबारमात्र टीएसएले २२ लाखभन्दा धेरै यात्रुको सुरक्षा जाँच गरेको थियो । जुन महामारी सुरु भएयता उक्त विमानस्थलमा गरिएको सबैभन्दा धेरै सुरक्षा जाँच हो । सप्ताहन्त भएकाले शनिबार पनि ठूलो संख्यामा यात्रुहरुले उक्त विमानस्थलबाट यात्रा गरिरहेका थिए ।
मान्छेहरु हलवेतिर दौडेको देख्दा सुरुमा विमान छुट्ने डरले उनीहरु दौडेको जस्तो लागेको तर धेरैभन्दा धेरै मान्छे दौडेको देखेपछि आफूपनि आत्तिएको एक प्रत्यक्षदर्शीले बताए । मान्छेहरु चिच्याउदै दौडेको र कसैलाई सोध्दा गोली चलेको भन्दै भाग्न भनेपछि आफूपनि भागेको ती प्रत्यक्षदर्शीले बताए ।
विमानस्थलका कर्मचारीहरुले सबैलाई शान्त राख्न प्रयास गरेका थिए । आत्तिएका यात्रुहरु भित्तामा आड लागेर बसेका थिए ।