पेरिसको नोट्रे डाम आगलागीको दुईबर्षपछि अर्को ल्याण्डमार्कमा भीषण आगलागी
प्रकाशित मिति : मंसिर ४, २०७८ शनिबार
पेरिसमा रहेको विश्व प्रसिद्ध नोट्रे डाम क्याथ्रेडलमा आगलागी भएको दुईबर्षपछि पेरिसकै अर्को प्रसिद्ध ल्याण्डमार्कमा आगलागी भएको छ । मध्य पेरिसको प्लेस डे लोपेहा स्क्वायर नजिकैको ब्लुभर्ड डे क्यापसिनोको भवनमा शनिबार ठूलो आगलागी भएको छ ।
आगलागीपछि आकाशमा धुँवाको मुस्लो देखिएको छ । अग्नीनियन्त्रकहरुले आगो नियन्त्रणमा लिने प्रयास गरिरहेको भन्दै उक्त क्षेत्रमा नजान सर्वसाधारणहरुलाई सुचित गरिएको छ । के कारणले आगलागी भएको हो भन्नेबारे स्पष्ट छैन ।
चर्चित ओपेरा हाउस नजिकै आगलागी भएको जनाइएको छ । सयौं अग्नीनियन्त्रकहरु घटनास्थलमा खटिएका छन् ।
सन् २०१९ को अप्रिलमा नोट्रे डाम क्याथेड्रल आगलागीबाट ध्वस्त भएको थियो । १५ घण्टासम्म भएको आगलागीमा क्याथेड्रलमा उल्लेख्य क्षति भएको थियो ।
आठ सय वर्ष भन्दा पुरानो ऐतिहासिक चर्चमा आगलागी भएपछि आगोले चर्चको माथिल्लो भाग खरानी बनाएको थियो । चर्चको दुई बेल टावर भने जोगिएको थियो । फ्रान्सेली राष्ट्रपति इम्मानुयल म्याक्रोनले चर्चमा आगो लाग्दा पुरै देश जलिरहेको जस्तो लागेको बताएका थिए ।