अमेरिकामा दुईजनाको ज्यान जानेगरी गोली चलाएका टीनएजरले पाए अदालतबाट उन्मुक्ति
प्रकाशित मिति : मंसिर ३, २०७८ शुक्रबार
अमेरिकामा चर्चित मुद्दाका अभियुक्त १८ बर्षका काइल रिटेनहाउसलाई ५ वटै अभियोगमा उन्मुक्ति दिइएको छ । उनले सन् २०२० को अगस्त २५ मा विसकन्सिनको केनोसामा जातीय न्यायका लागि भएको प्रदर्शनमा गोली चलाउँदा २ जनाको ज्यान गएको थियो भने १ जना घाइते भएका थिए ।
गोली चलाउँदा १७ बर्षका रहेका रिटेनहाउसले आत्मरक्षाका लागि गोली चलाएको बयान दिएका थिए । आफ्नो जीवन जोखिममा रहेको त्रासका कारण उनले गोली चलाएको उनको प्रतिरक्षामा बताइएको थियो । रोटेनहाउसले चलाएको गोली लाग्दा ३६ बर्षका जोसेफ रोजेनबम र २६ बर्षका एन्थोनी हबरको मृत्यु भएको थियो एकजना घाइते भएका थिए । गोली चलाउने रिटेनहाउस र गोली लागेकाहरु सबै श्वेत हुन् ।
प्रत्यक्षदर्शीका अनुसार केनोसा निवासी जोसेफ रोजेनबामले काइल रिटेनहाउसलाई पछ्याएका थिए । अचानक कोही तेश्रो पक्षले हावामा गोली हानेको थियो। त्यसपछि काइल रिटेनहाउस डराएका थिए । त्यसैबीच रोजेनबमले उनलाई प्रहार गरे । त्यसपछि रिटेनहाउसले रोजेनबममाथि गोली चलाए ।
त्यसपछि दौडिरहेका रिटेनहाउसमाथि अचानक एकजना व्यक्तिले लात हाने । रिटेनहाउसले ती उनीमाथि गोली चलाए । पछि एन्थोनी हबरले रिटेनहाउसको बन्दुक खोस्ने प्रयास प्रयास गर्दा रिटेनहाउसले हबरमाथि पनि गोली चलाए । अन्तमा ह्यान्डगन समातेका गेज ग्रोसक्रेट्जलाई पनि रिटेनहाउसले दाहिने बाइसेपमा गोली हाने ।
रिटेनहाउसबिरुद्ध आशययुक्त नरसंहार लगायतका ५ वटा अभियोगहरु लगाइएको थियो । यी अभियोगहरु पुष्टी भएको भए उनीबिरुद्ध अनिवार्य आजिवन कारावाशको सजाय हुने थियो । तर ७ जना महिला र ५ जना पुरुषसहितको १२ जनाको जुरी टिमले उनलाई सबै अभियोगमा उन्मुक्ति दिएको छ । पाँचपटकसम्म उनी निर्दोष रहेको फैसला उच्चारण गरिदा टीनएजर काइल रिटेनहाउस काप्दै भक्कानिएका थिए भने झण्डै ढलेका थिए ।
अदालती कारवाहीका क्रममा भिडियोका फ्रेमहरु समेत देखाइएको थियो । रिटेनहाउसका वकिलले आफूमाथि भएको आक्रमणबाट बच्न रिटेनहाउसले गोली चलाएको तर्क गरेका थिए । तर उनले किन कर्फयु आदेश तोडेर आफूले राम्रोसँग नचिनेका व्यक्तिको संरक्षणका लागि भन्दै गए भन्नेबारे प्रश्न उठेको थियो ।
अमेरिकामा बन्दुक हिंशा र जातीय भेदभावका सन्दर्भमा उच्च बहस श्रृजना गरेको यो मुद्दाको फैसलाका बारेमा समेत विभिन्न खाले प्रतिकृयाहरु सार्वजनिक भएका छन् । रिटेनहाउसले चलाएको गोली लागेर ज्यान गुमाएका २६ बर्षका एन्थोनी हबरका बुबाआमाले आफ्ना छोराको हत्याका लागि कसैलाई पनि जिम्मेबार नठहराइएको भन्दै दुख व्यक्त गरेका छन् ।
न्युयोर्कका मेयर बिल ब्लाजिओले अदालतको फैसलालाई घृणित बताएका छन् । तर विसकन्सिनका सिनेटर लगायतका रिपब्लिकनहरुले भने फैसलाको स्वागत गरेका छन् । अमेरिकी राष्ट्रपति जो बाइडेनले आफू लगायत धेरै अमेरिकनहरुलाई यो फैसलाले आक्रोशित तुल्याएपनि जुरी बोलिसकेकाले शान्तिपूर्ण तरिकाले आफ्ना विचारहरु व्यक्त गर्न आव्हान गरेका छन् ।