बाइडेनबाट उपराष्ट्रपति ह्यारिसलाई अस्थायीरुपमा राष्ट्रपतिको शक्ति हस्तान्तरण
प्रकाशित मिति : मंसिर ३, २०७८ शुक्रबार
शुक्रबार अमेरिकी राष्ट्रपति जो बाइडेनले आफ्नो नियमित क्लोनोस्कोपीका दौरानमा केहीबेरका लागि उपराष्ट्रपति कमला ह्यारिसलाई राष्ट्रपतिको शक्ति हस्तान्तरण गरेका छन् । केबल छोटो समयका लागिमात्र भएपनि कमला ह्यारिस राष्ट्रपतिको शक्ति प्राप्त गर्ने अमेरिकी इतिहासमा नै पहिलो महिला र पहिलो एसियन अमेरिकन भएकी छिन् ।
आज विहान वाल्टर रिड अस्पतालमा उपचारका क्रममा राष्ट्रपति बाइडेनलाई केहीबेर अचेत बनाइएकाले उक्त अवधिका लागि राष्ट्रपतिको शक्ति हस्तान्तरण गरिएको हो । राष्ट्रपति जर्ज डब्ल्यु बुसका पालामा पनि सन् २००२ र २००७ मा यस्तै घटना भएको थियो । संविधानको प्रकृयाको पालना गर्दै एनेस्थेसियामा रहेको अवस्थाका लागि बाइडेनले राष्ट्रपतिको शक्ति हस्तान्तरण गरेका छन् ।
बाइडेनको अमेरिकी संविधानको २५ औं संसोधनको सेक्सन ३ को प्रयोग गरेर शक्ति हस्तान्तरण गरेका हुन् । यो प्रावधान अनुशार राष्ट्रपतिले सिनेटका अस्थायी अध्यक्ष र हाउस स्पीकरलाई आफू शक्ति प्रयोग गर्न अक्षम रहेको व्यहोराको लिखित घोषणा दिनुपर्छ । र कार्यवाहक राष्ट्रपतिका रुपमा उपराष्ट्रपतिलाई शक्ति हस्तान्तरण गर्नुपर्छ ।
शनिबार ७९ बर्ष पुग्न लागेका बाइडेनको जन्मदिनको एकदिन अगाडि नियमित स्वास्थ्य जाँच गर्न गरिएको छ । राष्ट्रपति भइसकेपछि यो उनको पहिलो नियमित स्वास्थ्यजाँच हो ।
राष्ट्रपति बाइडेनले विहान ११ बजेर ३५ मिनेटमा उपराष्ट्रपति ह्यारिस र ह्वाइटाउसका चिफ अफ स्टाफसँग कुरा गरेको र आफ्नो कार्यभार पुन सम्हालेको ह्वाइटहाउसले जनाएको छ । उनले केही समय अस्पतालमा नै आराम गर्ने जनाइएको छ ।