यस्तो देखियो ५८० बर्षपछिको दुर्लभ चन्द्रग्रहण, फोटो र भिडियो समेत
प्रकाशित मिति : मंसिर ३, २०७८ शुक्रबार
अमेरिकी समय अनुशार शुक्रबार विहान ५८० बर्षपछिको दुर्लभ चन्द्रग्रहण देखिएको छ । यसप्रकारको लामो खण्डग्राश चन्द्रग्रहण ५८० बर्षमा देखिएको खगोलविदहरुले जनाएका छन् ।
खण्डग्राश चन्द्रग्रहण भएपनि चन्द्रमाको अधिकांश भागमा ग्रहण लागेको छ । पृथ्वीको छायाका कारण चन्द्रमाको ९७ प्रतिशत भाग रातो रंगमा बदलिएको लस एन्जलसको ग्रिफित अवलोकनले जनाएको छ ।
ग्रहणका बेला चन्द्रमा कस्तो देखिएको थियो ? पूरै भिडियो यहाँ हेर्नुहोला ।
ग्रहण उच्च बिन्दुमा पुग्दा चन्द्रमाको सानोभागमात्र चम्केको देखिएको थियो । आजको चन्द्रग्रहण यो बर्षको पहिलो भने होइन, गत मेमा पनि चन्द्रग्रहण लागेको थियो । तर आजको भने विशेष हो ।
पूरै अवधि ६ घण्टाभन्दा लामो समयको रहेपनि मुख्य अवधि भने ३ घण्टा २८ मिनेटसम्म थियो । सन् १४४१ यताकै सबैभन्दा लामो खण्डग्राश चन्द्रग्रहण न्युयोर्क समय अनुशार शुक्रबार विहान १ बजेर २ मिनेटमा सुरु भएको थियो भने ४ बजेर २ मिनेटमा उच्च बिन्दुमा पुगेको थियो ।
जब चन्द्रमा र सूर्यकोबीचबाट पृथ्वी गुज्रेर जान्छ, तब पृथ्वीको छाया चन्द्रमामा पर्दा चन्द्रग्रहण लाग्छ । जसरी खग्राश सूर्यग्रहणमा पूरै सूर्य छोपिएर अन्धकारजस्तो अवस्था आउँछ, चन्द्रग्रहणमा भने त्यस्तो अवस्था आउँदैन । त्यसको साटो चन्द्रमामा फरक प्रकारको रातो चमक देखिन्छ ।
रातो रंगका कारण यसलाई ब्लड मुन समेत भनिन्छ । आजरातीको चन्द्रग्रहण उत्तर अमेरिकाबाट हेर्न सकिनेछ । दक्षिण अमेरिका, हवाई र रसियाको केहीभागबाट समेत यो चन्द्रग्रहण हेर्नसकिनेछ । अष्ट्रेलिया, न्यूजिल्याण्ड, जापान, चीन र दक्षिणपूर्वी एसियाका देशबाट पनि १९ नोभेम्बर शुक्रबार बेलुका यो चन्द्रग्रहण हेर्न सकिनेछ ।
यो चन्द्रग्रहण नांगो आँखाले पनि हेर्न सकिनेछ । नजिकबाट हेर्नका लागि बाइनाकुलर वा टेलिस्कोपको समेत प्रयो गर्न सकिनेछ । खराब मौषमका कारण आकाशमा हेर्न नसक्नेहरुले अनलाइनमा हेरेका छन् ।