अमेरिकाको ल्याबमा फ्रिजर सफा गर्दा भेटिए ३०० मिलियनको ज्यान लिएको खतरनाक भाइरसका शीशी
प्रकाशित मिति : मंसिर २, २०७८ बिहीबार
अमेरिकाको पेन्सिलभेनियामा एउटा शोधकेन्द्रमा फ्रिजर सफा गर्दा खतरनाक भाइरसका शीशीहरु भेटिएपछि एफबीआई जाँच सुरु गरेको छ । पेन्सिलभेनियाको फिलाडेल्फियामा रहेको मेरेकको शोधकेन्द्रमा बिफरका भाइरसले भरिएका शीशीहरु भेटिएका हुन् । १५ वटा शीशीहरुमध्ये ५ वटामा बिफर लिएको थियो ।
ल्याबका कर्मचारीले मंगलबार राती फ्रिजर सफा गर्दा दुर्घटनावश ती शीशीहरु भेटाएका थिए । उक्त भाइरसका कारण सन् १९०० को शताब्दीमा बिफरबाट ३ सय मिलियनभन्दा बढीको ज्यान गएको थियो भने आम भ्याक्सिन अभियानबाट उन्मुलन गरिएको थियो ।
ती नमुनाहरु रसिया र एटलान्टामा रहेका विश्वका दुईवटा ल्याबहरुमा मात्र भण्डारण गर्नुपर्नेमा पेन्सिभेनियाको ल्याबमा कसरी ल्याइयो भन्नेबारे एफबीआईएले अनुसन्धान गरिरहेको छ । एटलान्टामा रहेको सीडीसीको मुख्यालय र रसियाको भेक्टर प्रतिष्ठानमामात्र ती भाइरसका नमुनाहरु राख्न अनुमति रहेको एफबीआईएले जनाएको छ ।
अधिकांश अमेरिकनहरुले बिफरबिरुद्धको भ्याक्सिन लगाएका छैनन् । १० वटा शीशीहरुमा भ्याक्सिनिया लेखिएको थियो तर ती शीशीहरुमा बिफरको भ्याक्सिन बनाउन प्रयोग भएका भाइरस रहेको जनाइएको छ । बिफर ब्यापक भ्याक्सिन अभियानपछि सन् १९८० मा उन्मुलन भएको थियो ।
यो समाचार पहिलोपटक याहु न्यूजले प्रकाशित गरेको थियो । डिपार्टमेन्ट अफ होमल्याण्ड सेक्युरिटीलाई पठाइएको गोप्य अलर्ट याहु न्यूजले फेला पारेपछि उक्त घटनाबारे सार्वजनिक भएको हो । ती शीशीहरु कसरी पेन्सिलभेनियाको मेरेक लयाबमा आइपुगे भन्नेबारे अझै केही खुलेको छैन ।
भाइरसका शीशीहरु भेटिएपछि ती शीशीहरु तत्कालै सुरक्षित गरिएको छ भने मेरेक ल्याब लकडाउन गरिएको थियो । बुधबार बेलुकादेखि ल्याबमा गरिएको लकडाउन हटाइएको छ । सीडीसीले ती शीशीमा भएका भाइरससँग कसैको पनि हेलमेल नभएको जनाएको छ । ती शीशीहरु भेटाउने कर्मचारीले पञ्जा र मास्क लगाएका थिए ।