कोलोराडोमा स्कुल नजिकैको पार्कमा ६ विद्यार्थीमाथि गोली प्रहार, बन्दुकधारीहरु फरार
प्रकाशित मिति : कार्तिक २९, २०७८ सोमबार
कोलोराडोमा अरोरामा रहेको हाइस्कुल नजिकैको पार्कमा बन्दुधकारीहरुले ६ जना विद्यार्थीहरुमाथि गोली हानेको प्रहरीले जनाएको छ । अरोरा सेन्ट्रल हाइस्कुलका विद्यार्थीहरुमाथि गोली प्रहार भएको र ६ जनालाई अस्पताल लगिएको छ ।
घाइतेहरु १४ देखि १८ बर्षसम्मका भएको जनाइएको छ । घाइतेमध्ये एकजनाले गाडी चलाएर अरु घाइतेहरुलाई अस्पताल लगेका थिए । फरक फरक बन्दुकबाट गोली हानिएको र घटनास्थलमा धेरै शंकास्पद गाडीहरु रहेको प्रत्यक्षदर्शीले जनाएका छन् ।
केही व्यक्तिले चलिरहेका गाडीबाटै गोली चलाएको र केही व्यक्ति बाहिर सडकमा समेत रहेको प्रत्यक्षदर्शीको भनाई छ । दिउसो १२ बजेर ४५ मिनेट जाँदा उक्त घटना भएको प्रहरीले जनाएको छ । घाइतेहरु कसैको पनि अवस्था ज्यानै जाने खालको नभएको जनाइएको छ ।
हाइस्कुल भन्दा उत्तरतिरको नोमपार्कमा घटना भएको जनाइएको छ । यो पार्क सानो खेलमैदान र सामुदायिक बगैचा रहेको शुन्य दशमलव ८ एकडमा फैलिएको पार्क हो । पार्कमा दर्जनौंपटक गोली चलेको प्रत्यक्षदर्शीको भनाई छ । कम्तीमा ३० राउण्डसम्म गोली चलेको प्रत्यक्षदर्शीले बताएका छन् ।
बन्दुकधारीहरु फरार रहेकाले प्रहरीले कुनै सुचना भएमा जानकारी गराउन सर्वसाधारणलाई आग्रह गरेको छ । घटना के कारणले भएको हो भन्नेबारे अझै केही खुलेको छैन ।