विशेष समारोहका बीच बाइडेनबाट पूर्वाधार प्याकेजमा हस्ताक्षर, प्याकेजमा के छ ?
प्रकाशित मिति : कार्तिक २९, २०७८ सोमबार
अमेरिकी राष्ट्रपति जो बाइडेनले आज विशेष समारोहकाबीच १ दशमलव २ ट्रिलियन डलरको ऐतिहासिक द्वीपक्षीय पूर्वाधार प्याकेजमा हस्ताक्षर गरेका छन् । अब यो प्याकेजले अमेरिकामा आगामी ५ बर्षका लागि पूर्वाधार विकाशमा ५ सय ५० बिलियन डलरको नयाँ लगानी गर्नेछ । यो लगानी बाटोघाटो, पूल, यातायात, ट्रेन, एयरपोर्ट, पोर्ट र जलमार्ग लगायतका क्षेत्रमा हुनेछ ।
जसमध्ये ११० बिलियन बाटो, पूल र मुख्य पूर्वाधार परियोजनामा खर्च गरिनेछ भने ४० बिलियन डलर पूलको मर्मत, प्रतिस्थापन र पुनस्र्थापनामा खर्च गरिनेछ । ११ बिलियन डलर यातायात सुरक्षाका क्षेत्रमा खर्च गरिनेछ । जसमा दुर्घटना कम गर्ने कार्यक्रमहरु ल्याउने लगायत छन् ।
प्याकेजमा अमेरिकाको ब्रोण्डब्याण्ड पूर्वाधार सुधारका लागि ६५ बिलियन डलर समावेश गरिएको छ । पानी र विद्युत प्रणाली सुधारका लागि पनि दशौं बिलियन डलर छुट्याइएको छ । विद्युतीय गाडीको चार्जरका लागि देशब्यापी सञ्जाल विकाशका लागि समेत साढे ७ बिलियन डलर छुट्याइएको छ ।
यो बिल सुरुमा गत अगस्तमा ६९ मतका साथ सिनेटबाट पारित भएको थियो भने विपक्षमा ३० मत परेको थियो । गत नोभेम्बर ५ मा १३ जना रिपब्लिकन सांसदहरुले साथ दिएपछि यो बिल प्रतिनिधिसभाबाट पनि पारित भएको थियो । अमेरिकाको अर्थतन्त्रका सन्दर्भमा राष्ट्रपति बाइडेनले चालेका कदमप्रति असहमति जनाउँदै बाइडेनको लोकप्रियताका कमी आइरहेको विभिन्न सर्वेक्षणले देखाइरहेको सन्दर्भमा विशेष समारोहका बीच यो प्याकेजमा गरिएको हस्ताक्षरले बाइडेनको लोकप्रियता बढ्नसक्ने अनुमान गरिएको छ । ्
प्याकेज हस्ताक्षर समारोहमा सांसदहरु, गभर्नरहरु र दुबै पार्टीका मेयरहरुको उपस्थीति रहेको थियो । यो बिल पारित हुनुलाई अमेरिकी संसदमा उल्लेख्य दुईदलीय जीतका रुपमा हेरिएको छ । यो बिल अमेरिकी इतिहासमा नै पूर्वाधार विकाशका क्षेत्रमा एकैपटक गरिने सबैभन्दा ठूलो लगानी हो ।
यो बिल डेमोक्र्याट्स र रिपब्लिकनहरु एकसाथ आएर परिणाम ल्याउन सक्ने कुरा प्रमाणित गरेको राष्ट्रपति जो बाइडेनले बताएका छन् । बाइडेनले बिल पारित गर्न सहयोग गरेकोमा उपराष्ट्रपति कमला ह्यारिस, क्याबीनेटका सदस्यहरु र संसदलाई धन्वयाद दिएका छन् । बाइडेनले हस्ताक्षर समारोहमा दिएको मन्तव्यको अधिकांश भागमा अमेरिकन जनतालाई सिधै सम्बोधन गरिएको थियो ।
उपराष्ट्रपति कमला ह्यारिसले आजको दिन ऐतिहासिक भएको बताएकी छिन् । गृहयुद्धकै बीचमा अब्राहम लिंकनले अन्तरमहाद्वीपीय रेलमार्ग बनाउन सुरुवात गरेको, भयानक डिप्रेशनकै बीचमा फ्र्यांकलिन रुजभेल्टले हुभर ड्यामको निर्माण सम्पन्न गरेको शीत युद्धकै बीचमा ह्वाइट आइसेनहोवरलेऐन राष्ट्रिय अन्तरराज्यीय र रक्षा राजमार्ग ऐनमा हस्ताक्षर गरेको र आज बाइडेनले पूर्वाधार ऐनमा हस्ताक्षर गरेको ह्यारिसले बताइन् ।
त्यस्तै सिनेटमा डेमोक्रेटिक नेता चक शुमर र प्रतिनिधिसभामा स्पीकर न्यान्सी पेलोसीले पूर्वाधार विधेयकको प्रशंसा गर्दै आजको दिन अमेरिकाका लागि महान दिन भएको बताएका छन् । हस्ताक्षर समारोह ह्वाइट हाउसमा आयोजना गरिएको थियो ।