अमेरिकामा महँगी बढ्दै गर्दा बाइडेनको लोकप्रियता अहिलेसम्मकै कम ४१ प्रतिशत
प्रकाशित मिति : कार्तिक २८, २०७८ आईतबार
अमेरिकामा महँगी बढिरहेको अवस्थामा गरिएको एक सर्वेक्षणमा राष्ट्रपति जो बाइडेनको लोकप्रियता अहिलेसम्मकै कम बिन्दुमा पुगेको छ । वासिंटन पोष्ट र एबीसीले गरेको सर्वेक्षणमा बाइडेनको स्वीकृति दर ४१ प्रतिशतमा झरेको छ ।
सर्वेक्षणको पूर्ण पाठ यहाँ पढ्नुहोला ।
वशन्तमा गरिएको सर्वेक्षणको तुलनामा बाइडेनको लोकप्रियतामा ११ प्वाइन्ट गिरावट आएको छ । जम्मा ३९ प्रतिशतले बाइडेनको अर्थतन्त्र परिचालनको तरिका स्वीकृत गरेका छन् । बाइडेनको लोकप्रियता आफ्नै पार्टीभित्र पनि घटेको छ ।
८० प्रतिशत डेमोक्र्याट्सहरु बाइडेनप्रति सकारात्मक रहेका छन् । यो दर जुन महिनामा ९४ प्रतिशत रहेको थियो । ५ महिनामा यो दरमा १४ प्वाइन्टले गिरावट आएको छ । आइतबार सार्वजनिक सर्वेक्षणमा १० जना डेमोक्र्याट्समध्ये मुस्किलले ४ जनाले बाइडेनलाई बलियो समर्थन गरेका छन् । जुनमा हरेक १० जनामा ७ जनाले यस्तो समर्थन गरेका थिए ।
अमेरिकामा मुद्रास्फीति दर ३० बर्षमा नै सबैभन्दा उच्च भएको अवस्थामा बाइडेनले अमेरिकाको अर्थतन्त्र परिचालनको तौरतरिकाबारे कडा आलोचना भइरहेको छ । सर्वेक्षणमा भाग लिएकाहरुमध्ये ७० प्रतिशतले अमेरिकाको अर्थतन्त्र गलत आकारमा गएको बताएका छन् । ३८ प्रतिशतले अमेरिकाको अर्थतन्त्र कमजोर भएको बताएका छन् ।
सर्वेक्षणमा भाग लिएकाहरुमध्ये आधाभन्दा धेरैले मुद्रास्फीति बढ्नुका पछाडि सिधै बाइडेनको दोष भएको बताएका छन् । सर्वेक्षण १ हजार १ जना अमेरिकनबीच गरिएको थियो । जसमा ८८२ जना रजिस्टर्ड मतदाता रहेका थिए । नोभेम्बर ७ देखि १० को बीचमा ल्याण्डलाइन र मोबाइल फोनमार्फत सर्वेक्षण गरिएको थियो ।