आष्ट्राजेनेकाबाट कोरोनाबिरुद्धको भ्याक्सिनबाट नाफा कमाउन सुरु, विकाशोन्मुख देशलाई विना नाफा
प्रकाशित मिति : कार्तिक २६, २०७८ शुक्रबार
आष्ट्राजेनेकाले कोरोनाबिरुद्धको भ्याक्सिन बेचेर नाफा कमाउन सुरु गरेको छ । बर्षको सुरुको ९ महिनामा आष्ट्राजेनेकाले २ दशमलव २ बिलियन डलरको भ्याक्सिन बेचेको आष्ट्राजेनेकाले यो बर्षको अन्तिम तीनमहिनामा ठीक्क नाफा कमाउन सुरु गर्ने अपेक्षा गरेको छ । यस अगाडि अधिकांश आपूर्ति नाफा नलिइकनै गरिएको थियो ।
अक्टोबरदेखि डिसेम्बरसम्मको बिक्री पहिलेकै आपूर्ति सहमति अनुशार हुने जनाइएको छ । यो अवधिमा थप नयाँ अर्डर पनि आउने कम्पनीको अपेक्षा रहेको छ । विकाशोन्मुख देशहरुका पहिलेका अर्डरहरुमा भने नाफा नलिइकनै आपूर्ति गर्ने कम्पनीका प्रवक्ताले जनाएका छन् ।
अक्सफोर्ड युनिभर्सिटीसँगका भ्याक्सिन आपूर्ति सम्झौतालाई आफूहरुले आगामी दिनमा पनि पालना गर्ने र सस्तो मूल्यमा भ्याक्सिन आपूर्ति गर्ने कम्पनीको भनाई छ । कम्पनी र यसका लाइसेन्स पार्टनरहरुले सेप्टेम्बर ३० सम्म १ दशमलव ५ बिलियन भ्याक्सिनका डोजहरु १७० भन्दा धेरै देशमा आपूर्ति गरिसकेका छन् ।
सन् २०२० को तुलनामा सन् २०२१ को अहिलेसम्ममा कम्पनीको नाफामा ६३ प्रतिशत गिरावट आएको छ । सन् २०२० मा २ दशमलव ७५ बिलियन डलर नाफा गरेको कम्पनीले सन् २०२१ को अहिलेसम्म जम्मा ३७१ मिलियन नाफा गरेको छ । नाफा नलिइकनै भ्याक्सिन उपलब्ध गराइएकाले कम्पनीको कुल नाफामा नै गिरावट आएको कम्पनीले जनाएको छ ।