अमेरिकामा अचानक ग्रोसरीको मूल्यबृद्धि, आगामी दिनमा अझ बढ्ने, यस्तो छ कारण !
प्रकाशित मिति : कार्तिक २५, २०७८ बिहीबार
अमेरिकामा हुनुहुन्छ भने सम्भवत तपाईले खाद्यान्न लगायत घरका लागि आवश्यक सामाग्रीको मूल्य बढेको अनुभव गर्नुभएको होला । तपाईले सन् २०२२ मा पनि ग्रोसरीका लागि धेरै मूल्य तिर्नुपर्ने अवस्था आउने सम्भावना रहेको छ ।
सेप्टेम्बरदेखि अक्टोबरसम्म किराना सामानको भुक्तानी मुल्य १ प्रतिशतले बृद्धि भएको छ । यो गत बर्षको यही समयको तुलनामा ५ दशमलव ४ प्रतिशतले बढी रहेको ब्यूरो अफ लेबरले सार्वजनिक गरेको तथ्यांकमा जनाइएको छ ।
विगत १२ महिनामा भाडा, कार, उर्जा लगायतको मूल्यमा ६ दशमलव २ प्रतिशत बृद्धि भएको छ । जुन सन् १९९० यताकै सबैभन्दा ठूलो बृद्धि हो । ग्रोसरीमा पनि गाईको राम्रो मासुमा उच्च मूल्यबृद्धि भएको छ । गतबर्षको अक्टोबरको तुलनामा गाईको मासुमा २४ दशमलव ९ प्रतिशत मूल्यबृद्धि भएको छ ।
गतबर्षको तुलनामा अण्डाको मूल्य अक्टोबरमा ११ दशमलव ६ प्रतिशत बृद्धि भएको थियो । कुखुराको मासुमा ८ दशमलव ८ प्रतिशत र सिरियलमा ५ प्रतिशत मूल्यबृद्धि भएको थियो । बच्चाको खानामा पनि गतबर्षको तुलनामा ७ दशमलव ९ प्रतिशतले मूल्यबृद्धि भएको छ ।
अमेरिकामा ग्रोसरीको मूल्य सन् २०१५ देखि सन् २०१९ सम्म स्थीर रहेको थियो । तर महामारीको बेलामा सन् २०२० मा भने बढेको थियो । सन् २०१९ को तुलनामा सन् २०२० मा ग्रोसरीको मूल्य ३ दशमलव ७ प्रतिशत बढेको थियो ।
खाद्य तथा ग्रोसरी उत्पादकहरुको महामारीको बेलामा बस्तु, श्रम, यातायात तथा अन्य खर्चमा बृद्धि भएको थियो । पछिल्ला महिनाहरुमा यो खर्च अझ बृद्धि भएको थियो । जसका कारण उत्पादकहरुले खुद्रा बिक्रेताहरुका लागि ग्रोसरीको मूल्य बढाएका थिए । जसका कारण ग्राहकहरुले त्यसको भार खेप्ने अवस्था आएको छ ।
मूल्य निर्धारकहरुले आफ्ना सेवा र बस्तुका लागि प्राप्त गर्ने मूल्य मापन गर्ने उत्पादक मूल्य सुचकांक सेप्टेम्बरको तुलनामा अक्टोबरमा शुन्य दशमलव ६ प्रतिशत बृद्धि भएको थियो भने गतबर्षको तुलनामा ८ दशमलव ६ प्रतिशत बढेको थियो । बढ्दो लागत खर्चका कारण ठूला ठूला उत्पादकहरुले मासु, स्न्याक लगायतका ग्रोसरीमा सन् २०२२ को सुरुतिर मूल्य बढाउने योजना बनाएको बताएका छन् ।
कतिपय कम्पनीहरुले स्टोरमा राखिएका कैयन सामानको डिस्काउन्ट अफर समेत हटाइरहेका छन् । माग बढेका कारण सामान डिस्काउन्टमा उपलब्ध गराउँदा सामानको अभाव हुनसक्ने भन्दै डिस्काउन्ट अफरहरु समेत धमाधम हटाइदैछ । आगामी जनवरीमा अमेरिकी उत्पादनमा ७ प्रतिशतसम्म मूल्यबृद्धि हुने अनुमान गरिएको छ ।
सामानको मूल्यबृद्धि भएका कारण कम आम्दानी हुने ग्राहकहरु मारमा परेका छन् । कम आम्दानी हुने परिवारले बर्षमा खानाका लागि औषतमा ४ हजार ४ सय डलर र बढी आम्दानी हुने परिवारले झण्डै १४ हजार डलर खर्च गर्ने सन् २०१९ को तथ्यांक रहेको छ । कम आम्दानी हुनेहरुले आम्दानीको ३६ प्रतिशत र बढी आम्दानी हुनेहरुले आम्दानीको ८ प्रतिशत खानामा खर्च गर्छन् ।
सामानको मूल्य बृद्धि भएपनि फुड स्ट्याम्प, चाइल्ड ट्याक्स क्रेडिट लगायतका सुविधामा भएको बृद्धिका कारण कम आम्दानी हुनेहरुलाई व्यवस्थापन गर्न केही सहज हुने अपेक्षा गरिएको छ । गत जुलाईमा पुरक खाद्य कार्यक्रम अन्तरगत ४१ मिलियन व्यक्ति सुविधाका लागि सहभागी थिए ।