अमेरिकामा अन्य रोगले अस्पताल गएका १० हजार बढीलाई अस्पतालमा नै कोरोना संक्रमण
प्रकाशित मिति : कार्तिक २१, २०७८ आईतबार
अमेरिकामा १० हजार भन्दा धेरैलाई अस्पतालमा नै कोरोना संक्रमण भएको पुष्टी भएको छ । उनीहरु ह्दयघात, मृगौला खराब र मानसिक रोग लगायतका विभिन्न रोगकारण अस्पताल गएपनि अस्पताल गइसकेपछि कोरोना संक्रमण भएको थियो ।
गतबर्ष अन्य प्रकारका रोगका कारण अस्पताल भर्ना भएका १० हजार भन्दा धेरै बिरामीहरुलाई अस्पताल गइसकेपछि कोरोना संक्रमण भएको सरकारको संघीय र राज्यको तथ्यांकहरु विश्लेषण गर्दा देखिएको छ । यो नम्बर वास्तविक भन्दा अझ कम भएको तथा यो तथ्यांकमा ६५ बर्ष वा सो भन्दा माथिकाहरुको मात्र विवरण समावेश भएको जनाइएको छ । क्यालिफोर्निया र फ्लोरिडाका भने सबै उमेरका बिरामीको संख्या समावेश छ ।
गतबर्षको अप्रिलदेखि सेप्टेम्बरसम्म अस्पताल गइसकेपछि कोरोना संक्रमण भएका बिरामीहरुमध्ये झण्डै २१ प्रतिशतको मृत्यु भएको थियो । उक्त समयमा अन्य रोगका कारण अस्पताल गएका जम्मा ८ प्रतिशत बिरामीहरुको मात्र मृत्यु भएको थियो ।
फ्लोरिडाका ६६ बर्षका स्टेभन जोन्सनलाई गतबर्षको नोभेम्बरमा अस्पताल भर्ना हुनुभन्दा अगाडि कोरोना परीक्षण गर्दा नेगेटिभ रिपोर्ट आएको थियो । तर उनी अन्य कुनै कारणले अस्पताल भर्ना हुने अवस्था आयो । अस्पतालमा भर्ना भएको १३ दिनपछि उनलाई कोरोना संक्रमण पुष्टी भयो । लगत्तै उनलाई फोक्सोको कडा संक्रमण भयो । त्यसको तीनदिनपछि उनको मृत्यु भयो ।
जोन्सनकी पत्नी लगायतको परीक्षण गर्दा कोरोना नेगेटिभ देखिएको थियो । अस्पतालका कर्मचारीहरुबाटै जोन्सनलाई कोरोना संक्रमण भएको उनका परिवारको विश्वास छ ।