कामदारलाई भ्याक्सिन अनिवार्य नगर्ने अमेरिकी व्यवसायलाई १ लाख ३६ हजार डलरसम्म जरिवाना
प्रकाशित मिति : कार्तिक १८, २०७८ बिहीबार
अमेरिकामा एकसयभन्दा बढी कर्मचारी भएका ठूला रोजगारदाता कम्पनीले जनवरी ४ सम्म आफ्ना कामदारका लागि भ्याक्सिन अनिवार्य नगरे १ लाख ३६ हजार ५ सय ३२ डलरसम्म जरिवाना हुने भएको छ । बाइडेन प्रशासनले एकसयभन्दा बढी कर्मचारी हुने कम्पनीका कामदारलाई जनवरी ४ देखि भ्याक्सिन अनिवार्य गर्दै हरेक गम्भिर उल्लंघनका लागि १३ हजार ६ सय ५३ डलरसम्म जरिवाना गर्ने घोषणा गरेको छ । जानाजान नियम उलंघन गर्ने विजनेशलाई १ लाख ३६ हजार ५ सय ३२ डलरसम्म जरिवाना गरिने भएको हो ।
बाइडेन प्रशासनले बिहिबार निजी क्षेत्रलाई समेत कोरोनाबिरुद्धको भ्याक्सिन अनिवार्यको नियम लागु हुने मिति घोषणा गर्दै एकसयभन्दा बढी कामदार हुने कम्पनी, संघीय ठेकेदार र निश्चित स्वास्थ्यकर्मीहरुका लागि समेत भ्याक्सिन अनिवार्यको नियम जनवरी ४ देखि लागु हुने घोषणा गरेको हो ।
मापदण्डभित्र पर्नेहरुले जनवरी ४ अगाडि नै मोडेर्ना वा फाइजर भ्याक्सिनको दुबै डोज लगाएको हुनुपर्नेछ । त्यस्तै जोन्सन एण्ड जोन्सन भ्याक्सिनको एक डोज लगाएकाहरुलाई पनि मान्यता दिइनेछ । महामारीको सामना गर्ने एउटामात्र उचित बाटो भ्याक्सिन लगाउनु नै रहेकाले यो नियमको पालना गर्न राष्ट्रपति जो बाइडेनले सबैलाई आग्रह गरेका छन् ।
यो नियम अन्तरगत अमेरिकामा एकसय मिलियन भन्दा धेरै कामदारहरु पर्नेछन् । एकसयभन्दा बढी कामदार भएका कम्पनीमा काम गर्नेहरु अमेरिकामा ८४ मिलियनभन्दा धेरै रहेका छन् । त्यस्तै यो श्रेणीमा पर्ने स्वास्थ्यकर्मीहरु १७ मिलियनको हाराहारीमा छन् । संघीय ठेकेदारहरुका लागि डिसेम्बर ८ देखि भ्याक्सिन अनिवार्य गराउने योजना रहेपनि अब उनीहरुका लागि पनि जनवरी ४ कै डेडलाइन तोकिएको छ ।
अमेरिकामा अहिलेसम्म १९२ मिलियनभन्दा धेरैले कोरोनाबिरुद्धको भ्याक्सिनको पूर्ण डोज लगाएका छन् । बुस्टर डोज लगाउनेहरुको संख्या समेत २० मिलियन नाघेको छ । अमेरिकामा कोरोना संक्रमणबाट अहिलेसम्म झण्डै साढे ७ लाखको ज्यान गइसकेको छ । हरेक दिन ७० हजारभन्दा धेरै नयाँ संक्रमण पुष्टी हुने गरेको छ ।