कडा प्रतिस्पर्धापछि न्युजर्सी गभर्नरमा फिल मर्फी झिनो मतान्तरले विजयी
प्रकाशित मिति : कार्तिक १८, २०७८ बिहीबार
न्युजर्सी गभर्नरमा डेमोक्रेटिक उम्मेदबार फिल मर्फी झिनो मतान्तरले विजयी भएका छन् । मतगणनाको अन्तिमसम्म पनि कडा प्रतिस्पर्धाकाबा बाजुत मर्फीले पूर्व राज्यसांसद समेत रहेका ज्याक सिटारेलीलाई पराजित गर्न सफल भएका हुन् ।
६४ बर्षका मर्फी चार दशकको इतिहासमा न्युजर्सीमा दोश्रोपटक निर्वाचित हुन सफल पहिलो डेमोक्रेटिक गभर्नर हुन् । अब उनी थप ४ बर्षका लागि न्युजर्सीका गभर्नर हुनेछन् । न्युजर्सीको गभर्नर हुन चाहनेले सबै न्युजर्सीलाई सुन्नुपर्ने र आफूले पूरै न्युजर्सीलाई सुनेको निर्वाचित भए लगत्तै मर्फीले भने ।
मंगलबार भएको चुनावपछि मतगणना भइरहँदा कैयनपटक मर्फीलाई रिपब्लिकन उम्मेदबार सिटारेलीले उछिनेका थिए । विगतमा जो बाइडेनले जितेको भर्जिनियामा रिपब्लिकनले जितेपछि न्युजर्सीको परिणामबारे पनि सिंगै अमेरिकाको ध्यान केन्द्रीत भएको थियो ।
९१ प्रतिशत मतगणना हुँदा मर्फीले १२ लाख ३८ हजार ६६ मत ल्याएका छन् भने सिटारेलीले १२ लाख २ हजार ३ सय ४८ मत ल्याएका छन् । मर्फीले ५० दशमलव ३ प्रतिशत र सिटारेलीले ४८ दशमलव ९ प्रतिशत मत ल्याएका छन् ।