टेक्सासमा सयौं व्यक्ति भएको हेलोवीन पार्टीमा गोली चल्दा १ को मृत्यु, ९ घाइते
प्रकाशित मिति : कार्तिक १४, २०७८ आईतबार
टेक्सासको टेक्सारकानामा सयौं व्यक्ति भएको हेलोवीन पार्टीमा गोली चल्दा १ जनाको को मृत्यु भएको छ । घटनामा ९ जना घाइते भएको प्रहरीले जनाइको छ । घटनास्थल डलासबाट १८० माइल पूर्वमा रहेको छ ।
ओक्टाभिया इभेन्ट सेन्टरमा मध्यरातभन्दा ठीक अगाडि गोली चलेको थियो । गोली चलेपछि भागदौड मच्चिएको र घटनास्थलमा पुग्दा कैयन व्यक्ति घाइते भएर भित्रै लडेको प्रहरीले जनाएको छ ।
घाइतेहरुलाई वाड्ले रिजनल मेडिकल सेन्टर र क्रिस्टस सेन्ट माइकल हस्पिटलमा उपचारका लागि लगिएको थियो । एम्बुलेन्स, प्रहरीका गाडी र निजी गाडीमार्फत घाइतेहरुलाई अस्पताल लगिएको थियो । अस्पताल लगेको केही छिनमा एकजना २० बर्षका पुरुषको मृत्यु भएको थियो ।
घाइते ९ जनाको अवस्था भने गम्भिर नरहेको जनाइएको छ । घटनाबारे अनुसन्धान भइरहेको र घटना हुँदा त्यहाँ कम्तीमा दुईचारसय व्यक्ति रहेको प्रहरीको भनाई छ ।
गोली चलाउने व्यक्ति एकजना अश्वेत पुरुष भएको जनाइएको छ । गोली चलाएपछि गाडीमा चढेर भागेको प्रहरीको भनाई छ । घटना के कारणले गराइएको हो भन्ने स्पष्ट छैन । तर पार्टीमा संलग्न केही व्यक्तिबीच भएको विवादका कारण गोली चलेको प्रारम्भिक अनुमान छ ।