अफगानिस्तान छाड्नु अगाडिको अमेरिकी ड्रोन हमलाको निशाना झुक्किएर यी सर्वसाधारणमाथि
प्रकाशित मिति : भाद्र २६, २०७८ शनिबार
अफगनिस्तान छाड्नु अगाडि अमेरिकाले काबुलमा गरेको ड्रोन हमलामा अमेरिकी सेनाले गल्तीले सर्वसाधारणलाई निशानामा पारेको हुनसक्ने देखिएको छ । न्यूयोर्क टाइम्समा प्रकाशित रिपोर्ट अनुशार अमेरिकी सेनाले गरेको ड्रोन हमलाको निशानामा झुक्किएर सर्वसाधारणमाथि परेको हुनसक्ने जनाइएको छ ।
१३ जना अमेरिकी सेनासहित १६३ जना अफगानीको ज्यान जानेगरी विमानस्थलमा भएको बिष्फोटपछि अगस्त २७ मा अमेरिकी सेनाले ड्रोन आक्रमण गरेर आईसीसका २ जनालाई मारेको बताएको थियो । त्यसको २ दिनपछि अगस्त २९ मा अमेरिकाले काबुलमा अर्को ड्रोन आक्रमण गरेर विमानस्थलमा हुनसक्ने सम्भावित हमलालाई टारेको दावी गरेको थियो । पेन्टागनले अर्को बम आक्रमण रोक्न आफूह सफल भएको बताएपनि अगस्त २९ को हमलामा आईसीसका कोही सदस्य नरहेको बरु निशानामा सर्वसाधारण परेको पुष्टी गर्ने प्रमाणहरु बाहिर आएका छन् ।
उक्त हमलामा अमेरिकी सहायता समुहमा काम गर्ने निर्दोष व्यक्ति र उनको परिवार निशानामा परेको देखिएको छ । अमेरिकाले बिष्फोटक पदार्थ लोड गरिरहेका आईसीस सदस्यमाथि निशाना बनाएको र नजिकै रहेका ९ जना सर्वसाधारणहरु मारिएको बताएपछि न्युयोर्क टाइम्सले प्रकाशित गरेका भिडियो र बयानका आधारमा हेर्दा त्यहाँ आईसीसका सदस्यहरु नै नरहेको तथा सर्वसाधारण जेमारी अहमादी र उनका ९ जना परिवारका सदस्यहरु नै निशानामा परेर मारिएको देखिएको छ । मारिनेहरुमा ७ जना बालबालिकाहरु रहेका थिए ।
अहमादीले १४ बर्षदेखि क्यालिफोर्नियामा रहेको परोपकारी समुहमा काम गर्दै आएका थिए जसले भोका अफगानीहरुलाई खुवाउने काम गर्दै आएको थियो । उक्त परोपकारी संस्थाले अहमादीलाई अमेरिकामा बसाई सर्नका लागि शरणार्थीका रुपमा आवेदन प्रकृया समेत अगाडि बढाएको थियो । नयाँ फुटेजमा अहमादीले आफूले काम गर्ने अफिसमा पानीका कन्टेनरहरु भरेर घरतिर ल्याउँदै गरेको देखिएको छ । उनी बस्ने स्थानमा पानीको अभाव भएकाले उनले अफिसबाट पानी ल्याउँदै गरेका थिए ।
त्यसदिन अहमादी अफिसबाट कामदारहरुलाई घर लैजाने काममा सहभागी रहेका थिए । अहमादी र उनका साथीले गाडीमा पानीका कन्टेनरहरु लोड गरिरहदा अमेरिकी सेनाले बिष्फोटक पदार्थ लोड गरेको आशंका गरेको हुनसक्ने न्युयोर्क टाइम्सले सार्वजनिक गरेका भिडियो र अन्तरवार्ता लिएका एकदर्जनभन्दा बढी व्यक्तिको भनाइबाट देखिएको छ । अमेरिकी सेनाले सुरुमा ड्रोन हमलामा ३ जना सर्वसाधारणको ज्यान गएको बताएपनि वास्तवममा १० जना सर्वसाधारणको ज्यान गएको पुष्टी भएको छ ।