चीनबाट आयो अन्तिम खेप ‘भेरोसेल’, अहिलेसम्म नेपालमा ९७ लाख ८२ हजार डोज खोप
प्रकाशित मिति : श्रावण १५, २०७८ शुक्रबार
नेपालमा चाइनिज भ्याक्सिन भेरोसेल लगाउने क्रममा
चीनबाट नेपाल सरकारले खरिद गरेको अन्तिम खेप ‘भेरोसेल’ खोप शुक्रबार काठमाडौं आइपुगेको छ । पाँचौ पटक नेपाल वायु सेवा निगमको वाइडवडी ३३० जहाज बेइजिङबाट खोप ल्याएसँगै चीनबाट ४० लाख डोज ‘भेरोसेल’ खोप आइपुगेको हो ।
निगमको जहाजले यसअघि चार कार्गो उडानबाट आठ लाख डोजका दरले ३२ लाख खोप ल्याएकोमा शुक्रबार अन्तिम ८ लाख डोज ल्याएको हो । सरकारले प्राप्त खोपलाई अग्रभागमा खटिने कर्मचारी, ५० बर्ष माथिका नागरिक र आवस्यकताका आधारमा वितरण गरिरहेको छ । सरकारले चीन सरकारसँग सरकार–सरकार (जिटुजी) मार्फत जम्मा ४० लाख डोज खोप खरिद गरेको थियो ।
अहिलेसम्म नेपालमा ९७ लाख ८२ हजार डोज खोप
चीनबाट यो खोप आएसँगै नेपालमा कोरोना भाइरस विरूद्धको खोप ९७ लाख ८२ हजार डोज आइपुगेको छ । कोभ्याक्सबाट र भारतबाट डोनेशनमा प्राप्त कोभिशिल्ड, चीनबाट डोनेशनमा प्राप्त भेरोसेल, अमेरिकाबाट कोभ्याक्समार्फत प्राप्त जोन्सन एण्ड जोन्सन, भारतको द सीरम इन्ष्टिच्यूटबाट खरिद कोभिशिल्ड र चीनबाट खरिद गरिएको भेरोसेल गरी ९७ लाख ८२ हजार डोज खोप नेपालमा प्राप्त भएको हो ।
चीनले नेपाललाई डोनेशनमा ९ लाख जनसंख्यालाई पुग्ने १८ लाख डोज भेरोसेल उपलब्ध गराएको थियो । भारतले नेपाललाई ५ लाख जनसंख्यालाई पुग्ने १० लाख डोज कोभिशिल्ड उपलब्ध गराएको थियो । कोभ्याक्समार्फत कोभिशिल्ड तीन लाख ४८ हजार डोज उपलब्ध भएको थियो ।
जुलाइको दोश्रो साता अमेरिकाले नेपाललाई कोभ्याक्समार्फत १५ लाख ३४ हजार ८ सय ५० डोज जोन्सन एण्ड जोन्सन भ्याक्सिन नेपाल पठाएको थियो । अमेरिकाले एसियाका विभिन्न देशलाई दिने २३ मिलियन डोज भ्याक्सिनमा नेपाललाई पनि भ्याक्सिन उपलब्ध गराउने प्रतिवद्धता जनाए अनुरुप उक्त खोप पठाएको हो ।
भारतको द सीरम इन्ष्टिच्यूटबाट खरिद गरेको २० लाख डोज कोभिशिल्ड मध्ये १० लाख मात्र आएको आएकाले बाँकी १० लाख डोज आउन बाँकी छ । पहिलो डोज कोभिशिल्ड लगाएका झण्डै १३ लाखले ४ महिना बितिसक्दा पनि दोश्रो डोज पाउन सकेका छैनन् ।
जापानले नेपाललाई १६ लाख डोज आस्ट्राजेनेका खोप कोभ्याक्समार्फत् उपलब्ध गराउने प्रतिवद्धता जनाएको छ । उक्त खोप नेपालमा पहिलो डोज कोभिशिल्ड लगाएका तर दोश्रो डोज नपाएकाहरुलाई दिइने जनाइएको छ । नेपालमा लगाइएको र भारतबाट ल्याइएको कोभिशिल्ड खोप पनि अक्सफोर्ड आष्ट्राजेनेकाले नै विकाश गरेको हो । भारतमा उत्पादन गरिएकाले नाममात्र फरक हो ।
त्यस्तै नेपाल सरकारले फाइजरबाट कोरोनाबिरुद्धको खोप खरिदका लागि प्रकृया अगाडि बढाएको छ । अमेरिकन कम्पनी फाइजरले जर्मन कम्पनी बायोएनटेकसँग मिलेर विकाश गरेको कोरोनाबिरुद्धको खोप फाइजर अमेरिकामा १२ बर्षभन्दा माथिका व्यक्तिलाई लगाउन स्वीकृत रहेको छ । नेपाल सरकारले पनि १२ बर्षमाथिका व्यक्तिलाई लगाउनका लागि उक्त खोप किन्ने प्रयास गरिरहेको बताएको छ ।
फाइजरसँग नेपाल सरकारले खोप किन्ने प्रयास गरिरहेको फाइजरको पुष्टी गरेको छ । फाइजरको कर्पोरेट अफेयर्सकी एसिया प्यासेफिक र चीनका लागि ग्लोबल मिडिया रिलेशन हेर्ने अधिकारी रोमा नायरले खोपबारे नेपालको सरकारसँग छलफल चलिरहेको पुष्टी गरिन् । तर कति डोज खोप र कहिलेसम्म उपलब्ध गराउने भन्नेबारे टुंगो लागेको छैन ।