अमेरिकामा दासता अन्त्य भएको दिनको उपलक्ष्यमा अब संघीय बिदा
प्रकाशित मिति : असार ३, २०७८ बिहीबार
अमेरिकामा दासता अन्त्य भएको दिनको उपलक्ष्यमा अब संघीय बिदा हुने भएको छ । अमेरिकी राष्ट्रपति जो बाइडेनले दासता अन्त्य भएको दिन सन् १८६५ को जुन १९ लाई जनाउने जुनटिन्थलाई संघीय बिदा घोषणा गर्ने कानूनमा हस्ताक्षर गरेका छन् । जुन १९ लाई छोटोरुपमा जुनटिन्थ भनिन्छ ।
जुनटिन्थ त्यस्तो दिन हो, जुन दिन दासताको मुक्ति घोषणा गरिएको खबर दासहरु मुक्त गरिएको अन्तिम बिद्रोही राज्य टेक्सासको ग्याल्भेस्टोनमा रहेका मानिसहरुमाझ पुगेको थियो । अब्राहम लिंकनले मुक्तिको घोषणामा सन् १८६३ नै हस्ताक्षर गरेका थिए तर ग्याल्भेस्टनमा उक्त घोषणा संघीय सिपाहीहरुले सन् १८६५ को जुन १९ मा नपढ्दासम्म लागु गरिएको थिएन ।
दासको अन्त्य भएको दिनको सम्झनामा संघीय बिदा घोषणा गरिएकोमा अमेरिकामा रहेका अश्वेत लगायत दासताको अन्त्यको पक्षमा रहेका सबैले उत्सव मनाइरहेका छन् । तर यही अवशरमा कैयनले भने अमेरिकाको प्रणालीगत विभेदको अन्त्य आवश्य रहेको बताएका छन् । दासता अन्त्य भएको झण्डै १६० बर्ष पुग्न लाग्दा पनि अमेरिकामा प्रणालीगत विभेद कायमै रहेको छ ।
यो बिल सिनेटमा एकमतले गत साता पारित भएको थियो भने प्रतितिधिसभामा १४ जना सांसदहरुले बिलको विपक्षमा मतदान गरेका थिए । अधिकांश संघीय कामदारहरुले जुन १८ शुक्रबार नै बिदा पाउने भएका छन् । जुनटिन्थको सम्मानमा शुक्रबार राज्य र सिटी सरकारका अफिसहरु पनि बन्द हुने भएका छन् । सरकारी स्कुलहरु पनि शुक्रबार बन्द गरिनेछ ।
१९ जुन औपचारिक रुपमा संघीय बिदाको दिन हुनु अगाडि पनि कैयन राज्यहरुले जुनटिन्थ मनाउदै आएका थिए । जुनटिन्थको अवशरमा सन् १९८० मा पहिलोपटक राज्यमा बिदा दिने निर्णय गर्ने पहिलो राज्य टेक्सास हो ।