जिम्मी कार्टर राष्ट्रपति हुँदाका अमेरिकी उपराष्ट्रपति वाल्टर मण्डेलको ९३ बर्षमा निधन
प्रकाशित मिति : बैशाख ६, २०७८ सोमबार
अमेरिकाका पूर्व उपराष्ट्रपति वाल्टर मण्डेलको ९३ बर्षको निधन भएको छ । सन् १९८४ को राष्ट्रपति चुनावमा रोनाल्ड रेगनसँग पराजित भएका मण्डेल त्यसअगाडि जिम्मी कार्टर राष्ट्रपति हुँदा उपराष्ट्रपतिका रुपमा सेवा गरेका थिए ।
उनको मिनापोलिसमा घरमै निधन भएको हो । परिवारका सदस्यहरुका बीचमा मण्डेलको निधन भएको उनको पारिवारिक श्रोतले जानकारी दिएको छ । सामाजिक न्यायका समर्थक मण्डेलले सन् १९६० बाट राज्यको एटोर्नी जनरलका रुपमा समेत काम गरेका थिए ।
सिनेटर हबर्ट हम्फेरी अमेरिकाको उपराष्ट्रपति निर्वाचित भएपछि सिनेटको रिक्त स्थानमा मण्डेललाई नियुक्त गरिएको थियो । उनले सिनेटमा सन् १९६४ देखि सन् १९७६ सम्म मिनेसोटाको प्रतिनिधित्व गरेका थिए । सन् १९७६ मा भने उनले जिम्मी कार्टरको उपराष्ट्रपतिका रुपमा चुनाव लडे ।
मण्डेल सन् १९७७ देखि सन् १९८१ सम्म अमेरिकाको उपराष्ट्रपति भए । पछि मण्डेलले जापानका लागि अमेरिकी राजदूतका रुपमा समेत काम गरे । क्लीन्टनको माताहतमा इन्डोनेशियाका लागि विशेष दूतका रुपमा समेत उनले काम गरेका थिए ।
पछिल्ला बर्षहरुमा उनमा उल्लेख्य स्वास्थ्य समस्याहरु देखिएका थिए । सन् २०१४ मा उनको मुटुको सफल शल्यकृया समेत गरिएको थियो । अर्को बर्ष उनी फ्लुको संक्रमणका कारण अस्पतालमा भर्ना भएका थिए । उनकी पत्नीको सन् २०१४ मा निधन भइसकेको छ ।