अप्रिलमा ४५ सय सम्म केस नम्बर हुने नेपाली डिभी विजेता भिसाका लागि योग्य
प्रकाशित मिति : फाल्गुन ११, २०७७ मंगलबार
आगामी अप्रिलमा ४५ सय सम्म केस नम्बर हुने नेपाली डिभी विजेताहरु भिसाका लागि योग्य हुने भएका छन् । मार्च ३१ मा आप्रवासन रोक अन्त्य भएमा उनीहरुले अप्रिलमा भिसा पाउन सक्नेछन् । डोनाल्ड ट्रम्पले लम्बाएको आप्रवासन रोक राष्ट्रपति जो बाइडेनले थप्ने सम्भावना नरहेको वर्तमान अवस्थामा उनीहरुमध्ये कैयनले अप्रिलको पहिलो साताबाट भिसा पाउनसक्ने सम्भावना रहेको छ ।
अमेरिकी सरकारको विदेश मन्त्रालय ब्यूरो अफ कन्सुरल अफेयर्सले आज जारी भिसा बुलेटिन अनुशार अप्रिलका लागि ४५ सय सम्म केस नम्बर हुने नेपालीका लागि भिसा करेन्ट हुनेछ ।
यदि बाइडेनले आप्रवासन रोक खारेज गरेको खण्डमा ४२ सय सम्म केस नम्बर हुने डिभी विजेताहरुले मार्च महिनामा पनि भिसा पाउन सक्नेछन् । तर खारेज नगरेको खण्डमा उक्त संख्याभित्र केस नम्बर हुने र अमेरिकामा रहेकाहरु मात्र स्टाटस एड्जस्टका लागि योग्य हुनेछन् ।
सन् २०२१ का लागि डिभी विजेता नेपालीहरुको संख्या भने ३८०१ रहेको छ । उनीहरुले गत अक्टोबर १ देखि भिसा पाउन सुरु गर्ने नियम भएपनि भिसा पाउनमा ढिलो भएको छ । सन् २०२१ का डिभी विजेताहरुमा नेपाल एसियामा दोश्रो भएको छ ।
कोरोनाको महामारीका कारण अमेरिकी दूतावास काठमाडौंको नियमित भिसा सेवा सुचारु नभएपनि यदि आप्रवासन रोक अन्त्य भएमा भने दूतावासले साधन श्रोतले भ्याएसम्म आप्रवासी भिसाहरु जारी गरिरहने सम्भावना छ । अहिले पनि अमेरिकी नागरिकका दम्पत्ति वा छोराछोरीहरुका लागि अमेरिकी दूतावास काठमाडौंले आप्रवासी भिसा जारी गरिरहेको छ ।
सन् २००७ को अक्टोबर १ अगाडिका अमेरिकी नागरिकका दाजुभाई दिदीबहिनीको भिसा मार्चमा करेन्ट
त्यस्तै गत सेप्टेम्बरमा अदालतको आदेशपछि ४ सय ४ जना नेपालीहरुले डाइभर्सिटी भिसा पाएका थिए । झण्डै तीनसाताको अवधिमा उक्त संख्यामा नेपालीहरुलाई डाइभर्सिटी भिसा प्रदान गरिएको थियो । मार्च अन्त्यसम्मको आप्रवासन रोकका कारण उनीहरु अमेरिका आउन भने पाएका छैनन् ।
युएस डिस्ट्रिक्ट कोर्ट वासिंटन डिसीका न्यायाधिस अमित मेहताले सन् २०२० का डिभी विजेताहरुलाई भिसा जारी गर्न आदेश दिएपछि सेप्टेम्बरको दोश्रो सातादेखि डिभी विजेताहरुलाई भिसा जारी गर्न सुरु गरिएको थियो । उनीहरुले सेप्टेम्बरको अन्त्यसम्म भिसा पाएका थिए । तर उनीहरु ट्रम्पको आप्रवासन रोक जारी रहँदासम्म अमेरिका आउन नपाउने भएकाले नेपालमै रोकिएका छन् ।
तर अब भने उनीहरुको भिसाको म्याद अरु ६ महिना थपिने भएको छ । युएस डिस्ट्रिक्ट कोर्टका न्यायाधिस अमित मेहताले भिसा पाइसकेका र मार्च ३१ सम्मको आप्रवासन रोकका कारण अमेरिका आउन नसकेका डिभी विजेताहरुको भिसा थप ६ महिना लम्बाउन आदेश दिएका हुन् । सन् २०२० का डिभी विजेताहरु मार्च ३१ सम्म अमेरिका आउन नपाएपनि उनीहरुको भिसा सेप्टेम्बरसम्म लम्बिने देखिएको छ ।
भिसा पाएर अमेरिका आउन नपाएका सन् २०२० का डिभी विजेताको भिसा ६ महिना थपिने
अदालतको आदेशपछि डाइभर्सिटी भिसा प्राप्त गर्न सफल ४०४ नेपालीहरु मध्ये २२५ जना प्राथमिक डिभी विजेता नेपाली रहेका थिए भने १०५ जना उनीहरुका दम्पत्ति थिए । त्यस्तै ७४ जना उनीहरुका छोराछोरीहरु रहेका थिए । काठमाडौंमा रहेको अमेरिकी दूतावासलेमात्र सेप्टेम्बरमा ३७९ जना डिभी विजेताहरुलाई भिसा जारी गरेको थियो । जसमध्ये २१२ जना प्राथमिक डिभी विजेताहरु, ९५ जना उनीहरुका दम्पत्ति र ७२ जना उनीहरुका छोराछोरीहरु रहेका थिए । अदालतको आदेशपछि आफूहरुले सकेजतिलाई भिसा जारी गरेको काठमाडौंस्थीत नेपाली दूतावासले जनाएको थियो ।
सन् २०२० का लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये झण्डै साढे १३ सय जना प्राथमिक डिभी विजेताहरुलेमात्र अमेरिकाको भिसा प्राप्त गर्न सफल भए ।
आर्थिक बर्ष २०२२ का गत अक्टोबर ७ देखि डिभीका लागि आवेदन खुलेकोमा नोभेम्बर १० सम्म डिभी लोटरी भरिएको थियो । यो डिभीको नतिजा भने सन् २०२१ को मे ८ मा सार्वजनिक हुनेछ ।