सन् २००७ को अक्टोबर १ अगाडिका अमेरिकी नागरिकका दाजुभाई दिदीबहिनीको भिसा मार्चमा करेन्ट
प्रकाशित मिति : फाल्गुन ११, २०७७ मंगलबार
सन् २००७ को अक्टोबर १ अगाडि आवेदन दिएका अमेरिकी नागरिकका दाजुभाई दिदीबहिनीको आप्रवासी भिसा मार्चमा करेन्ट भएको छ । अर्थात् अमेरिकामा नै वैध स्टाटसमा हुनेहरुका सन्दर्भमा मार्चमा उनीहरुका लागि ग्रिनकार्ड आवेदन आई ४८५ फाइल गर्न सकिनेछ ।
तर अमेरिकाबाहिर हुनेहरुका सन्दर्भमा भने सन् २००६ को अक्टोबर २२ अगाडि आवेदन दिएकाहरुलाई मार्चमा भिसा जारी गरिने उल्लेख छ । यद्यपी मार्च ३१ सम्मको आप्रवासन भिसामा रोकका कारण दूतावासहरुले यो श्रेणीमा विशेष छुटमा पर्नेहरुबाहेक अन्यलाई भिसा जारी गरेका छैनन् ।
मार्च ३१ सम्मको ट्रम्पको यो आप्रवासन रोक राष्ट्रपति बाइडेनले खारेज गरेको खण्डमा भने उनीहरु भिसा प्राप्त गर्न योग्य हुनसक्नेछन् । तर खारेज गर्ने नगर्नेबारे अहिलेसम्म पुनरावलोकनमात्र भइरहेको जनाइएको छ ।
अमेरिकी सरकारको विदेश मन्त्रालय ब्यूरो अफ कन्सुलर अफेयर्सले सन् २०२१ को मार्चका लागि आज भिसा बुलेटिन जारी गरेको हो । जस अन्तरगत विभिन्न श्रेणीका भिसामा ग्रिनकार्ड पाउन लाग्ने अवधि र ग्रिनकार्ड फाइल गर्न मिल्ने मिति उल्लेख गरिएको छ ।
जनवरीको तुलनामा अमेरिकी नागरिकका दाजुभाई दिदीबहिनीहरुको ग्रिनकार्डको प्राथमिकता मितिको अवधि फेब्रुअरीमा एकसातामात्र सरेको थियो । अब फेब्रुअरीको तुलनामा मार्चमा पनि एकसातामात्र सरेको छ ।
जनवरीमा प्राथमिकता मिति सन् २००६ को अक्टोबर ८ रहेको थियो भने फेब्रुअरीमा एकसातामात्र सरेर अक्टोबर १५ भएको थियो । मार्चमा अक्टोबर २२ भएको छ । अर्थात् यो श्रेणीमा ग्रिनकार्ड प्राप्त गर्न झण्डै साढे चौधबर्षको अवधि लाग्छ ।
राष्ट्रपति बाइडेन समर्थित बिलमा बिलमा ब्याकलग हटाएर परिवारमा आधारित अध्यागमन प्रणालीको सुधार गर्ने उल्लेख छ । प्रयोग नभएका भिसाहरुको उचित वितरण गर्नुका साथै लामो प्रतिक्षा अवधि हटाएर हरेक देशका लागि तोकिएको भिसाको नम्बर पनि बढाउने प्रावधान बिलमा छ । बिल पारित भएमा परिवारका लागि अमेरिका आउनमा ३ बर्ष र १० बर्षको बार पनि खारेज गर्नेछ ।
