कोरोना संक्रमणपछि अस्पताल भर्ना भएका रिपब्लिकन सांसद रोन राइटको मृत्यु
प्रकाशित मिति : माघ २६, २०७७ सोमबार
कोरोना संक्रमणपछि अस्पताल भर्ना भएका रिपब्लिकन सांसद रोन राइटको मृत्यु भएको छ । अमेरिकी संसदको तल्लो सदन प्रतिनिधिसभामा टेक्सासबाट प्रतिनिधित्व गर्ने राइटको निधन भएको संसदीय कार्यालयले सोमबार जारी गरेको वक्तब्यमा जनाइएको छ ।
आइतबार ६७ बर्षको उमेरमा उनको निधन भएको जनाइएको छ । उनको मृत्यु हुँदा उनकी पत्नी सुजन पनि छेउमा रहेको जनाइएको छ । दुईसाता अगाडि सांसद रोन र उनकी पत्नी सुजन कोरोना संक्रमणका कारण डायलसको बेलर अस्पतालमा भर्ना भएका थिए ।
राइट पदमै रहेको बेलामा कोरोना संक्रमणबाट अमेरिकामा मृत्यु हुने पहिलो सांसद हुन् । यसअगाडि लुजियानाबाट नवनिर्वाचित सांसद लुक लेट्लोको डिसेम्बरमा पदभार ग्रहण गर्नु अगाडि नै निधन भएको थियो ।
राइटलाई भने गत जनवरी २१ मा कोरोना संक्रमण पुष्टी भएको थियो । उनले त्यतीबेला आफूलाई सामान्य लक्षणहरुमात्र देखिएको र आफ्ना क्षेत्रका जनताका लागि घरबाटै काम गरिरहेको बताएका थिए । प्रतिनिधिसभामा रिपब्लिकन नेता केभिन मेकार्थीले रोनको निधन भएकोमा श्रद्धाञ्जली व्यक्त गरेका छन् ।
रोनले क्यान्सरसँग पनि लडिरहेका थिए । रोन राइटले सन् २०१९ देखि टेक्सासको छैठौं संसदीय जिल्लाको प्रतिनिधित्व गर्दै आएका थिए ।