न्युयोर्कमा रेष्टुरेण्ट कामदार र ट्याक्सी ड्राइभरलाई भ्याक्सिनका लागि योग्य बनाउन गर्भनरको अनुमति
प्रकाशित मिति : माघ २०, २०७७ मंगलबार
गभर्नर एन्ड्रयु कुमोले रेष्टुरेण्टमा काम गर्नेहरु र ट्याक्सी ड्राइभरहरुलाई कोरोनाबिरुद्धको भ्याक्सिन प्राप्त गर्न योग्यको सुचीमा राख्न न्युयोर्कका स्थानीय सरकारहरुलाई अनुमति प्रदान गरेका छन् । यदि स्थानीय सरकारले भ्याक्सिन दिन सकेको खण्डमा रेष्टुरेण्टमा काम गर्नेहरु र ट्याक्सी ड्राइभरहरु अब भ्याक्सिन पाउन योग्य रहेको कुमोले घोषणा गरेका हुन् ।
संघीय सरकारले राज्यहरुलाई अतिरिक्त भ्याक्सिनका डोजहरु उपलब्ध गराउने घोषणा गरेपछि कुमोको यस्तो घोषणा आएको हो । यसअगाडि गभर्नर कुमोले आपूर्तिमा अभावका कारण थपलाई योग्यताको सुचीमा थप्न नसकिने बताएका थिए । त्यस्तै शारीरिक वा मानसिक रुपमा विकाश नभएकाहरु पनि योग्य भएको कुमोले बताएका छन् ।
तर स्थानीय सरकारले आफ्नो स्थीति अनुशार यसबारे निर्धारण गर्ने उनको भनाई छ । तर न्युयोर्क सिटीले राज्यबाट अनुमति पाए अनुशार योग्यता बढाउने नबढाउनेबारे भने केही बताएको छैन । मेयर बिल डे ब्लाजिओले रेष्टुरेण्टका कामदारहरुलाई प्राथमिकता दिनेमा समर्थन गर्ने संकेत गरिसकेका छन् ।
न्युयोर्कमा झण्डै ३० लाख भ्याक्सिनका डोज डेलिभरी गरिएको सीडीसीले जनाएको छ । झण्डै १५ लाखले भ्याक्सिनका डोजहरु पाइसकेका छन् जसमध्ये दुबै डोज पाउनेहरु साढे ३ लाख बढी छन् ।
न्युयोर्कमा अहिलेसम्म भने ६५ बर्षभन्दा माथिका सबै, ग्रोसरी स्टोरमा ग्राहकतिर अनुहार फर्काएर काम गर्नुपर्नेहरु, अग्नीनियन्त्रक, प्रहरी, जनसुरक्षा संचारमा काम गर्नेहरु, कोर्ट अफिसरहरु, जेलमा काम गर्नेहरु, शिक्षण संस्था र चाइल्ड केयरमा काम गर्नेहरु, सार्वजनिक यातायातमा काम गर्नेहरु, होमलेस सेल्टरमा रहनेहरु भ्याक्सिन प्राप्त गर्न योग्य छन् ।