महामारी प्रभाव: न्युयोर्कको पहिलो नेपाली रेष्टुरेण्ट अस्थायीरुपमा बन्द, अन्यलाई मुस्किल
प्रकाशित मिति : माघ १५, २०७७ बिहीबार
महामारीका कारण अस्थायीरुपमा बन्द भएको न्युयोर्कको हिमालयन याक रेष्टुरेण्ट फोटो: राजन थपलिया/खसोखास
– किशोर पन्थी
‘नमस्ते । टासिदेलेक । हामीले स्थीति राम्रो भएर इन्डोर डाइनिङ संचालन नहुँदासम्मका लागि सबै सेवाहरु अस्थायी रुपमा बन्द गरेका छौं । हामी छिट्टै फर्कने प्रतिवद्धता व्यक्त गर्दछौं ।’
न्युयोर्कको ज्याक्सनहाइटमा रहेको चर्चित नेपाली रेष्टुरेण्ट हिमालयन याकमा फोन गर्दा अहिले त्यहाँका कर्मचारीको अभिवादन होइन, यस्तो अटोमेटिक सन्देश आउँछ । यो रेष्टुरेण्ट ७२२० रुजभेल्ट एभिन्युमा रहेको छ । यो रेष्टुरेण्ट गत डिसेम्बर २० देखि अस्थायी रुपमा बन्द भएको संचालक ग्याल्सेन गुरुङले जानकारी दिए । खासगरी नेपाली, तिब्बती, भुटनिज र इन्डियन खानाका साथमा लाइभ सुमधुर नेपाली र हिन्दी गीत संगीतका लागि चर्चित यो रेष्टुरेण्ट अब कहिलेदेखि खुल्ने हो केही निश्चित छैन ।
गुरुङ भन्छन् – ‘कहिलेदेखि खुल्ने हो अहिलेसम्म केही निश्चित छैन । इन्डोर डाइनिङ सुचारु नभएसम्म रेष्टुरेण्ट खोल्न सकिने अवस्था छैन । २५ प्रतिशतसम्म इन्डोर डाइनिङ खुल्यो भनेपनि सर्भाइभ गर्न सकिएला कि भन्ने आशा छ । नत्र कहिले खोल्ने ठेगान छैन ।’
गभर्नर एन्ड्रयु कुमोले केही योजना ल्याउलान् कि भन्ने उनको आशा छ । उनी भन्छन् – ‘२५ प्रतिशत इन्डोर डाइनिङ खुल्यो भने कम्तीमा काम गर्नेहरुको तलब दिन सकिएला कि भन्ने आशा छ । माथिपट्टी सेभेन ट्रेनको हल्ला र चिसोका कारण आउटडोर डाइनिङ संचालन गर्न गाह्रो भयो । अर्कोतर्फ ठाउको अभावले आउटडोर डाइनिङमा बढीमा १० जनासम्मको मात्र क्षमता भएकाले रेष्टुरेण्टको खर्च धान्न नै मुस्किल भयो । त्यसैले रेष्टुरेण्ट नै बन्द गर्नुपर्ने अवस्था आयो ।’
कर्मचारीहरुको तलब दिन र भाडा तिर्न नै मुस्किल भएपछि रेष्टुरेण्ट बन्द गर्नुपरेको उनले बताए । गुरुङ भन्छन् – ‘हामीले निकै संघर्ष र मिहिनेत गरेका थियौं । मार्चमा बन्द भएको रेष्टेरेण्ट मेमा खोलेर संचालन गर्ने प्रयास समेत गर्यौं । आउटडोर सिटिङ पनि बनायौं । चिसो बढ्दै गयो । इन्डोर डाइनिङ नहुँदा रेष्टुरेण्ट संचालन नै गर्न नसकिने अवस्था आयो ।’
सन् २००४ मा स्थापना भएको यो रेष्टुरेण्ट न्युयोर्कमा नै पहिलो नेपाली रेष्टुरेण्ट हो । सन् २००९ मा केहीसमय मर्मतका लागि बन्द भएको बाहेक अहिलेसम्म यो रेष्टुरेण्ट बन्द गर्नुपरेको थिएन । परम्परागत नेपाली खाना दालभात तरकारीदेखि नेपाली मम र याकका परिकारसमेत पाइने यो रेष्टुरेण्ट नेपाली र गैरनेपालीहरुमाझ अत्यन्तै लोकप्रिय रहेको छ । दुईतलामा संचालन भइरहेको यो रेष्टुरेण्ट नेपाली समुदायका विभिन्न कार्यक्रमहरुका लागि समेत लोकप्रिय स्थल हो ।
यो रेष्टुरेण्टलाई भिलेज भ्वाइसले सन् २००८ मा उत्कृष्ट तिब्बती रेष्टुरेण्टका रुपमा फिचर गरेको थियो । न्युयोर्क टाइम्स र वाल स्ट्रीट जर्नलमा पनि यो रेष्टुरेण्टका परिकारबारे फिचर र रिभ्युहरु प्रकाशित भएका थिए ।
न्युयोर्कको ज्याक्सनहाइट क्षेत्र मिनी नेपालका रुपमा परिचित छ । ज्याक्सनहाइट र आसपासमामात्र नेपालीहरुका दर्जनबढी रेष्टेरेण्टहरु संचालनमा रहेका छन् । तीमध्ये केही रेष्टुरेण्टहरु बन्द भएका छन् भने केही रेष्टुरेण्टहरु आंशिक रुपमा मात्र संचालनमा रहेका छन् । नेपालको झल्को मेटाउने ज्याक्सनहाइट कोरोना महामारीका कारण नेपाली आप्रवासीहरुका लागि नै बिरानो बन्दै गएको छ ।
त्यस्तै ज्याक्सनहाइटमा रहेको ब्याम्बु हाउस एण्ड बार पनि अस्थायी रुपमा बन्द भएको छ । कोरोनाको महामारीका कारण विजनेशमा गिरावट आएपछि र आउटडोर डाइनिङमा समेत चिसोका कारण समस्या भएपछि रेष्टुरेण्ट बन्द गर्नुपरेको संचालक नवराज केसीले जानकारी दिएका छन् ।
रेष्टुरेण्ट विगत तीनमहिनाभन्दा लामोसमयदेखि बन्द भएको छ । रेष्टुरेण्टमा टेकआउट र डेलिभरी पनि बन्द गरिएको छ । स्थीतिमा सुधार आएमा इन्डोर डाइनिङ संचालन गर्न अनुमति प्राप्त भएपछि वा आउटडोर डाइनिङका लागि बाहिरको तापक्रम न्यानो भएपछि रेष्टुरेण्ट खोल्ने योजना बनाएको संचालक केसीले जानकारी दिए ।
सन् २०१८ देखि संचालनमा आएको ब्याम्बु हाउस एण्ड बार कोरोनाको महामारीका कारण पहिलोपटक गतमार्चमा अस्थायीरुपमा बन्द भएको थियो । बीचमा केहीसमय खुलेपनि त्यसले निरन्तरता भने पाउन सकेन । संचालक केसीले भने -‘अहिलेकै अवस्थामा रेष्टुरेण्ट पुन खोलेर संचालन गर्नसकिने अवस्था छैन ।’
एकातिर अस्थायी रुपमा बन्द भएका रेष्टुरेण्टहरु कहिलेदेखि खुल्ने भन्ने निश्चित छैन भने अर्कोतर्फ संचालनमा रहेका रेष्टुरेण्टहरुपनि निकै मुस्किलले चलिरहेका छन् । ज्याक्सनहाइटमा रहेको चर्चित नेपाली रेष्टुरेण्ट मुस्ताङ थकाली किचनका संचालक नविन शेरचन भन्छन् -‘आउटडोर संचालन गर्नका लागि अगाडि धेरै ठूलो ठाउँ छैन । अर्कोतर्फ चिसो बढेकाले पनि आउटडोर संचालन गर्न नसकिएकाले अहिले टेकआउट र डेलिभरीमात्र संचालनमा रहको छ ।’
फापरको ढिंडोदेखि स्वादिष्ट नेपाली खानाका लागि यो रेष्टुरेण्ट १२ बर्षभन्दा लामोसमयदेखि परिचित छ । न्युयोर्कबाहिरका नेपालीहरु न्युयोर्क घुम्न आउँदा समेत नेपाली स्वादमा फापरको ढिंडो र सुकुटी खानका लागि यो रेष्टुरेण्टमा पुग्ने गर्थे । नेपालदेखि हजारौं माइल टाढा आएपनि यहाँको खानाले नेपालीहरुलाई नेपालको झल्को मेटाउने गरेको थियो ।
८० प्रतिशतभन्दा धेरै ब्यापार घटेकाले रेष्टुरेण्ट संचालनमा निकै कठिनायी भएको शेरचनले बताए । उनी भन्छन् – ‘अहिलेसम्म त पिकअप र डेलिभरीले जेनतेन धानिएको छ । तर कहिलेसम्म हो केही थाहा छैन ।’