लाइभ अपडेटः दिनभरको हिंशात्मक प्रदर्शनपछि कडा सुरक्षाबीच हाउसको बैठक पनि सुचारु


प्रकाशित मिति : पुस २२, २०७७ बुधबार

( बाँकी अपडेटका लागि यहाँ क्लीक गर्नुहोला । – सम्पादक)

 

9:05 PM(EST):पेलोसीबाट पनि हाउसको बैठक सुचारु

झण्डै साढे ७ घण्टाको अवरोधपछि हाउस स्पीकर न्यान्सी पेलासीले हाउसको बैठक सुचारु गरेकी छिन् ।

पेलोसीले भनिन् – ‘जसले हामीलाई हाम्रो जिम्मेवारीबाट विचलित बनाउने प्रयास गरे उनीहरू असफल भएका छन् । यसमा संलग्न भएकाहरूलाई न्याय प्रदान गरिनेछ ।’

 

8:50 PM(EST): ट्रम्पको फेसबुक पेज पनि २४ घण्टाका लागि लक

फेसबुकले डोनाल्ड ट्रम्पको फेसबुक पेज पनि २४ घण्टाका लागि लक गरिदिएको छ । ट्रम्पको पेजबाट फेसबुकको नीतिको उल्लंघन भएको भन्दै २४ घण्टाका लागि ट्रम्पले केही पोष्ट गर्न नसक्ने गरी लक गरिदिएको फेसबुकले जनाएको छ ।

8:05 PM(EST):संसदको  बैठक सुचारु

दिनभरको हिंशात्मक प्रदर्शनपछि कर्फयु र कडा सुरक्षाबीच संसदको  बैठक सुचारु भएको छ । उपराष्ट्रपति माइक पेन्सले विशेष सम्बोधन गरेका छन् । पेन्सले हिंशा खत्तम भएको र संसद सुरक्षित भइसकेको बताउँदै काम सुचारु गर्न भनेका छन् ।

पेन्सले भने – ‘हामीले आज हाम्रो संसदको रक्षा गर्यौं। यस ऐतिहासिक स्थानको रक्षा गर्न आफ्नो पोष्टमा उभिएका पुरुष र महिलाहरूप्रति हामी सधै आभारी हुनेछौं। हाम्रो संसदमा विनाशकारी गतिविधि गर्नेहरुले जितेनन् । हिंसाले कहिल्यै जित्दैन । स्वतन्त्रताले जित्छ । यो अझै पनि जनताको घर हो। हामीले संसद सुचारु गर्दै गर्दा विश्व फेरि हाम्रो लोकतन्त्रको सामर्थ्यको साक्षी हुनेछ ।’

पेन्सपछि सिनेटमा रिपब्लिकन नेता मिच म्याक्कोनेल र डेमोक्रेटिक नेता चक शुमरले सम्बोधन गरेका छन् । हिंशात्मक प्रदर्शनकारीहरु प्रजातन्त्रमा बाधा उत्पन्न गर्न असफल भएको रिपब्लिकन सिनेटर मिच म्याक्कोनेलले बताएका छन् । संसदले राष्ट्रपति चुनावका विजेतालाई प्रमाणिकरण गर्ने उनले बताएका छन् ।

7:45 PM(EST):उपराष्ट्रपति पेन्स सिनेटमा फर्किए

उपराष्ट्रपति माइक पेन्स सिनेटमा फर्किएका छन् । उपराष्ट्रपति माइक पेन्स सिनेटमा फर्किएका छन् । दिउसो अराजक भींड संसद भवनमा छिरेपछि स्थगित भएको संसद बैठकसँगै पेन्स सुरक्षित स्थलमा बसेका थिए । तर उनले क्यापिल हिल भने नछाडेको जनाइएको छ ।

7:26 PM(EST):ट्वीटरबाट ट्रम्पको एकाउन्ट १२ घण्टाका लागि लक

ट्वीटरले डोनाल्ड ट्रम्पको एकाउन्ट १२ घण्टाका लागि लक गरिदिएको छ । साथै ट्वीटरले उक्त एकाउन्ट स्थायी रुपमा नै खारेज गरिदिने चेतावनी समेत दिएको छ । ट्रम्पले ट्वीटरका नियम उल्लंघन गरेकाले अहिलेका लागि अस्थायी रुपमा लक गरिएको ट्वीटरले जनाएको छ । भविश्यमा नियमको उल्लंघन गरेर एकाउन्ट खारेज गर्ने ट्वीटरले चेतावनी दिएको हो ।

7:00 PM(EST):ट्वीटर र फेसबुक दुबैले हटाए समर्थकलाई सम्बोधन गरेको ट्रम्पको भिडियो

समर्थकलाई सम्बोधन गरेको डोनाल्ड ट्रम्पको भिडियो ट्वीटर र फेसबुक दुबैले हटाइदिएका छन् । ट्रम्पले दिउसो आफ्ना समर्थकहरुलाई सम्बोधन गर्दै घर फर्किन आप्व्हानका साथ भिडियो पोष्ट गरेका थिए । उक्त भिडियोमा आफूले प्रदर्शनकारीहरुलाई एकदमै माया गर्ने तर अब घर फर्किने बेला भएको बताएका थिए । ट्वीटरले ट्रम्पको अर्को ट्वीट पनि हटाएको छ । यसैबीच युट्युबले पनि ट्रम्पको भिडियो हटाइसकेको छ ।

6:51 PM(EST):संसदको संयुक्त बैठक आजै सुचारु हुने

इलेक्टोरल मतगणना गरेर जो बाइडेनको जीत औपचारिक रुपमा घोषणा गर्न संसदको बैठक आजै सुचारु हुने भएको छ । हाउस स्पीकर न्यान्सी पेलोसीले संसदको संयुक्त बैठक आजै सुचारु गर्ने निर्णय गरिएको बताइन् । संसदको बैठक सुचारु हुने सन्दर्भमा सांसदहरुलाई पत्राचार गरिएको छ । तर कति बजेदेखि सुचारु हुने भन्ने सन्दर्भमा केही बताइएको छैन ।

6:11 PM(EST):संसदभवनको भित्तामा चढ्दा ३० फिट तल खसेका व्यक्तिको अवस्था चिन्ताजनक

संसदभवनको भित्तामा चढ्दा ३० फिट तल खसेका व्यक्तिको अवस्था चिन्ताजनक रहेको जनाइएको छ । २४ बर्षका ती पुरुष क्यापिटल हिल भवनको पश्चिमतिरको भागमा चढेका थिए । उनलाई तत्कालै अस्पताल लगिएको थियो ।

6:01 PM(EST): डिसीक्षेत्रमा कर्फयु सुरु

वासिंटन डिसी क्षेत्रमा मेयरले घोषणा गरेको कर्फयु सुरु भएको छ । बेलुका ६ बजेदेखि सुरु भएको कर्फयु आदेश विहिबार विहान ६ बजेसम्म जारी रहनेछ । कर्फयुका बाबजुत प्रदर्शनकारीहरु अझै संसद भवन क्षेत्र बाहिर रहेका छन् । संसदभवनभित्र र संसदभवनको खुड्किलाहरुबाट भने प्रदर्शनकारीलाई हटाइएको छ ।

5:56 PM(EST):  संसद भवनभित्र  गोली हानिएकी  महिलाको मृत्यु

संसद भवनभित्र छिर्दा छातीमा गोली हानिएकी प्रदर्शनकारी महिलाको मृत्यु भएको छ । गोली लागेर सख्त घाइते ती महिलालाई अस्पताल लगिएको थियो । उनको अस्पतालमा निधन भएको जनाइएको छ ।

प्रदर्शनका क्रममा घाइते ६ जनालाई अस्पतालमा भर्ना गरिएको छ । १३ जना पक्राउ परेका छन् भने सुरक्षाकर्मीहरुले २ बिष्फोटक सहित ५ हतियार नियन्त्रणमा लिएका छन् ।

 

5:35PM(EST): विध्वंसकारीहरु सिनेटको फ्लोरमा पुग्नु अगाडि नै इलेक्टोरल मतपत्रहरु सुरक्षित स्थलमा

विध्वंसकारीहरु सिनेटको फ्लोरमा पुग्नु अगाडि नै इलेक्टोरल मतपत्रहरु सुरक्षित स्थलमा लगिसकिएको जनाइएको छ । जसका कारण इलेक्टोरल मतपत्रहरुमा कुनै क्षति पुगेको छैन । सिनेटका कर्मचारीहरुले विध्वंसकारीहरु प्रवेश गर्नु अगाडि नै मतपत्रहरु सुरक्षित गरिसकेका थिए । कर्मचारीहरुले सुरक्षित नगरेकोभए मतपत्रहरु भींडले जलाउने र नष्ट गर्ने सम्भावना रहेको थियो ।

5:07PM(EST): संसद भवनभित्रबाट सबै प्रदर्शनकारीलाई निकालियो तर संयुक्त बैठक अझै अनिश्चित

१२ इलेक्टोलर मत प्रमाणिकरण गरेर स्थगित भएको संसदको संयुक्त बैठक कतिबेलादेखि सुचारु हुने भन्ने निश्चित छैन । तर संसद भवनभित्रबाट सबै प्रदर्शनकारीलाई बाहिर निकालिएको छ । अहिलेसम्म जम्मा २ वटा राज्यको मात्र इलेक्टोरल मत प्रमाणिकरण गरिएको छ । अलाबामा र अलास्काको मत प्रमाणिकरण गरेलगत्तै एरिजोनाको मत प्रमाणिकरण गर्ने क्रममा रिपब्लिकनहरुले असहमति जनाएका थिए ।

4:20PM(EST): ट्रम्पबाट भिडियो सन्देश

राष्ट्रपति डोनाल्ड ट्रम्पले भिडियो सन्देश सार्वजनिक गर्दै समर्थकहरुलाई घर फर्किन भनेका छन् ।

ट्रम्पले भनेका छन् – ‘मलाई तपाईको पीडा थाहा छ, मलाई तपाईको चोट थाहा छ। तर तपाईहरु अब घर जानुपर्छ ।’

ट्रम्पले उक्त सन्देशमा चुनाव आफूले जितेको बताउन भने छाडेनन् ।

4:05PM(EST): नवनिर्वाचित राष्ट्रपति जो बाइडेनको सम्बोधन

नवनिर्वाचित राष्ट्रपति जो बाइडेनले विशेष सम्बोधन गरेका छन् । बाइडेनले भनेका छन् – ‘हाम्रो प्रजातन्त्रमाथि अभूतपूर्व हमला भएको छ ।’

 

3:56PM(EST): राष्ट्रपति ट्रम्पबाट सेना परिचालन

अमेरिकी संसद भवन क्षेत्रमा स्थीति नियन्त्रणमा लिन सेना परिचालन गरिएको जनाइएको छ । राष्ट्रपति ट्रम्पले नेशनल गार्ड लगायत अन्य सुरक्षा निकायहरुलाई निर्देशन दिएको ह्वाइट हाउस प्रेस सेक्रेटरीले जनाएकी छिन् । भर्जिनियाले स्थीति नियन्त्रणमा लिनका सघाउन राज्यका २ सय सुरक्षाकर्मीहरु पठाइरहेको जनाइएको छ । यसैबीच उपराष्ट्रपति माइक पेन्सले प्रदर्शनकारीहरुले संसदभवन क्षेत्र छाड्न आव्हान गरेका छन् ।

यसैबीच पेन्टागनका मुख्य प्रवक्ताले वासिंटन डिसीमा रहेको सबै नेशनल गार्ड परिचालन गरिएको बताएका छन् ।

3:39PM(EST):सिनेटतिरको स्थीति नियन्त्रणमा, भित्र छिरेका सबैलाई बाहिर निकालियो

संसद भवनमा सिनेटतिरको स्थीति नियन्त्रणमा लिइएको छ । भित्र छिरेका सबै प्रदर्शनकारीहरुलाई बाहिर निकालिएको छ । केही प्रदर्शनकारीहरु सिनेटको फ्लोरमा छिरेर मुख्य कुर्सीमा गएर समेत बसेका थिए । उनीहरु सबैलाई पश्चिम र पूर्वतिरको ढोकाबाट निकालिएको छ । सिनेटतिरको अवस्था शान्तिपूर्ण रहेको जनाइएको छ । प्रदर्शनकारीहरु हाउस स्पीकरको कुर्सीमा बसेका तस्वीर आएका छन् । हाउसतिरको अवस्था अझै स्पष्ट छैन ।

3:24PM(EST): सिनेटको मुख्य कुर्सीमा गएर बसे प्रदर्शनकारी, सांसदहरु अज्ञातस्थलमा सुरक्षित

संसद भवनभित्र छिरेका प्रदर्शनकारीहरु सिनेटको मुख्य कुर्सीमा गएर बसेको तस्वीर सार्वजनिक भएको छ ।

सिनेट र हाउसका सांसदहरुलाई भने सुरक्षित तरिकाले राखिएको जनाइएको छ । उनीहरुलाई राखिएको स्थलबारे सार्वजनिक गरिएको छैन ।

3:03PM(EST):संसदको फ्लोर खाली, उपराष्ट्रपति माइक पेन्सले संसद भवन छाडे

ट्रम्प समर्थक प्रदर्शनकारीहरुले संसद भवनको सुरक्षा घेरा तोडेपछि संसदको फ्लोर खाली गराइएको छ । उपराष्ट्रपति माइक पेन्सलाई पनि संसद भवनबाट बाहिर लगिएको छ । पेन्स संसदको संयुक्त सेसनका लागि संसद भवन गएका थिए ।

हाउसको च्याम्बरका अधिकारीहरुले सांसदहरुलाई कुर्सी मुनी लुक्नुपर्ने अवस्था आउनसक्ने चेतावनी दिएका थिए । यसैबीच रिपब्लिकन सांसद आदम किन्जिन्जरले कुको प्रयास भएको भन्दै ट्वीट गरेका छन् ।

 

2:45PM(EST): वासिंटन डिसीमा कर्फयु घोषणा

वासिंटन डिसीका मेयरले बेलुका ६ बजेदेखि लागु हुनेगरी कर्फयु आदेश घोषणा गरेका छन् । कर्फयु आदेश विहिबार विहान ६ बजेसम्मका लागि घोषणा गरिएको हो । ट्रम्पले उक्साएका प्रदर्शनकारीहरु संसद भवनमा छिरेपछि संसद बैठक अबरुद्ध भएको छ ।

2:38PM(EST):संसद प्रहरीबाट थप सुरक्षाबल माग

संसदभवन क्षेत्रको स्थीति तनावग्रस्त बनेपछि संसदभवनको क्षेत्रको सुरक्षामा खटिएको प्रहरीले थप सुरक्षाबल मागेको छ । प्रहरीले संघीय सुरक्षाबलको समेत माग गरेको जनाइएको छ । संसदभवनबाहिर कैयन शंकास्पद पोकाहरु भेटिएका छन् । डिसीको महानगरीय प्रहरी विभागले ससद प्रहरीको सहायताका लागि थप श्रोतहरु पठाएको जनाइएको छ ।

 

2:25PM(EST):सांसदहरुमा भागदौड, सिनेट र हाउसको बैठक अबरुद्ध

संसदभवनबाहिरको हिंशात्मक प्रदर्शनका कारण अचानक सिनेटको बैठक अवरुद्ध भएको छ । सिनेटर जेम्स ल्यांक्फोर्डले बोल्दाबोल्दै माथिल्लो च्याम्बरबाट कोही चिच्याएपछि सिनेटको बैठक अवरुद्ध भएको छ । त्यसपछि सांसदहरुबीच भागदौड भएको थियो ।

त्यस्तै हाउसको बैठक पनि अबरुद्ध भएको छ । संसदभवनको घेरा प्रदर्शनकारीले तोडेपछि हाउसको बैठक समेत अवरुद्ध भएको जनाइएको छ । भवनभित्र जोखिम भएपछि नजिकको अफिसमा बस्न र शान्त रहन भनिएको छ ।

 

2:11PM(EST):अमेरिकी संसद भवन लकडाउन

प्रदर्शनका कारण उत्पन्न तनावका कारण अमेरिकी संसद भवन क्षेत्र लकडाउन गरिएको छ । भवनबाहिर उपस्थीत भएका प्रदर्शनकारीहरु र सुरक्षाकर्मीहरु झडपका घटनाहरु भइरहेका छन् । राष्ट्रपति डोनाल्ड ट्रम्पको आव्हानमा प्रदर्शनकारीहरु वासिंटन डिसीमा भेला भएका हुन् । क्यापिटल हिलबाट कसैलाईपनि बाहिर निस्कन दिइएको छैन भने भित्र पस्न पनि दिइएको छैन ।

2:00PM(EST): चुनाव परिणामबिरुद्धको ट्रम्पको चुनौतीको रिपब्लिकन सिनेटर मिच म्याक्कोनेलको निन्दा

ट्रम्पको नेतृत्वमा भइरहेको चुनाव परिणामबिरुद्धको चुनौतीको रिपब्लिकन सिनेटर मिच म्याक्कोनेलले निन्दा गरेका छन् । सानातिना आरोपका आधारमा चुनावी परिणाम नै उल्टाएमा अमेरिकी लोकतन्त्र नै मृत्युको चक्रमा फस्ने उनले चेतावनी दिएका छन् ।

कसैले पनि आफैलाई राष्ट्रिय निर्वाचन आयोग घोषणा गर्न नसक्ने र मतदाता, राज्यहरु तथा अदालतहरु चुनावी परिणामबारे बोलिसकेको उनले बताए । यदि त्यसलाई हटाइएमा वा उल्टाइएमा अमेरिकाको गणतन्त्रलाई सधैका लागि हानी पुग्ने उनले बताए । सिनेटरहरुले बोल्ने क्रम जारी छ ।

1:48PM(EST): संसदका दुबै सदनमा अलगअलग छलफल जारी 

एरिजोनाको चुनावी परिणाम अस्वीकारबारे संसदका दुबै सदनमा छलफल चलिरहेको छ । सिनेटमा रिपब्लिकन सिनेटर मिच म्याक्कोनेल र डेमोक्रेटिक सिनेटर चक शुमरले बोलेका छन् । सिनेटको अध्यक्षता उपराष्ट्रपति माइक पेन्सले गरिरहेका छन् भने हाउसको अध्यक्षता स्पीकर न्यान्सी पेलोसीले गरिरहेकी छिन् ।

1:40PM(EST):बमको धम्कीपछि क्याफिटल हिलका दुई भवन खाली गराइयो

बमको धम्कीपछि सुरक्षाकर्मीले क्यापिटल हिलमा म्याडिसन भवन खाली गराएका छन् । ट्रम्पका समर्थकहरुले संसदबाहिर प्रदर्शन गरिरहेका छन् भने प्रहरीसँग झडप भइरहेका छन् । त्यस्तै सुरक्षाकर्मीले क्यानन हाउस अफिसको भवनपनि बमको धम्कीपछि खाली गराएका छन् ।

1:20PM(EST): संसदका दुबै सदनमा अलगअलग छलफल 

संसदका दुबै सेसनमा यो विषयमा अलगअलग छलफल सुरु भएको छ । यो छलफल झण्डै २ घण्टा चल्नेछ । सम्भवत एरिजोनाको चुनावी परिणामबारेको अस्वीकारलाई पारित गर्ने वा नगर्ने सन्दर्भमा मतदान पनि हुनसक्नेछ । त्यसपछिमात्र संसदको संयुक्त सेसन पुन: सुरु हुनेछ ।

1:15PM(EST) :संसदको संयुक्त सेसन स्थगित

अलाबामा र अलास्काको चुनावी परिणाम घोषणापछि एरिजोनाको परिणाम घोषणा गर्दा रिपब्लिकन सांसदहरुले अस्वीकार गरेका हुन् । चुनावी परिणाम अस्वीकारपछि संसदका दुबै सदनमा अलगअलग छलफलका लागि संसदको संयुक्त सेसन स्थगित भएको छ ।

1:05PM(EST) : संसदको संयुक्त सेसन सुरु

जो बाइडेनलाई राष्ट्रपति घोषणा गर्नेगरी इलेक्टोरल कलेज मत गणनका लागि संसदको संयुक्त बैठक सुरु भएको छ ।

उपराष्ट्रपति माइक पेन्सको अध्यक्षतामा इलेक्टोरल मत गणना सुरु भएको हो । अल्फावेटिकल अर्डरमा राज्यका प्रमाणपत्रहरु खोल्ने र गणकहरु समक्ष पेश गर्ने तालिका छ । बाइडेनले २७० इलेक्टोरल मत प्राप्त गर्नासाथ पेन्सले विजेता घोषणा गर्नेछन् ।

यो प्रकृया संघीय कानुनले तोके अनुशार भइरहेको छ । च्याम्बरमा स्पीकरको कुर्सीमा माइक पेन्स छन् भने न्यान्सी पेलोसी बायातिर छिन् । ४ जना गणकहरु क्लर्कको डेस्कमा छन् । संसदको यो संयुक्त सेसन गणना पूरा नहँदासम्म र परिणाम सार्वजनिक नगर्दासम्म जारी रहन्छ ।

आज संसदबाट राष्ट्रपतिमा बाइडेनको औपचारिक जीत घोषणा हुँदै, रोक्न ट्रम्पको अन्तिम प्रयास

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com