Follow @khasokhasmag

आज संसदबाट राष्ट्रपतिमा बाइडेनको औपचारिक जीत घोषणा हुँदै, रोक्न ट्रम्पको अन्तिम प्रयास


प्रकाशित मिति : पुस २२, २०७७ बुधबार

आज अमेरिकी संसदबाट अमेरिकी राष्ट्रपतिमा जो बाइडेनको जीतको औपचारिक घोषणा हुनेछ भएको छ । डिसेम्बर १४ मा इलेक्टरहरुले अमेरिकी राष्ट्रपतिमा जो बाइडेनको जीतलाई सदर गरिसकेकोमा आज संसदको संयुक्त सदनले मतहरु औपचारिक रुपमा गणना गर्नेछ ।

उपराष्ट्रपति माइक पेन्सले बाइडेनको जीतलाई आफूले रोक्न नसक्ने डोनाल्ड ट्रम्प समक्ष जानकारी गराइसकेका छन् । उनले आफूलाई प्रमाणिकरण रोक्ने कुनै अधिकार नभएको बताइसकेका छन् ।

संसदको प्रकृया सुरु हुँदै गर्दा विहान ११ बजे ट्रम्पले सम्बोधन गर्ने योजना रहेको जनाइएको छ । ट्रम्पले बाइडेनको जीतविरुद्ध प्रदर्शन गर्न आफ्ना समर्थकहरुलाई आव्हान गरिसकेका छन् भने उनका समर्थकहरु वासिंटन डिसीमा आउने क्रम सुरु भइसकेको छ । मंगलबार राती नै केही समर्थकहरु डिसीमा आइसकेका छन् भने प्रहरीसँग केही झडपका घटनाहरु समेत भएका छन् ।

उपराष्ट्रपति माइक पेन्सको अध्यक्षतामा यो काम हुनेछ । पेन्सले अल्फावेटिकल अर्डरमा राज्यका प्रमाणपत्रहरु खोल्नेछन् । र, चारजना गणकहरु समक्ष पेश गर्नेछन् । ४ जना गणकहरु दुईजना हाउसबाट र दुईजना सिनेटबाट हुनेछन् । बाइडेनले २७० इलेक्टोरल मत प्राप्त गर्नासाथ पेन्सले विजेता घोषणा गर्नेछन् ।

यो प्रकृया संघीय कानुनले तोके अनुशार हुनेछ । च्याम्बरमा स्पीकरको कुर्सीमा माइक पेन्स बस्नेछन्, न्यान्सी पेलोसी बायातिर बस्नेछिन् भने ४ जना गणकहरु क्लर्कको डेस्कमा बस्नेछन् । संसदको यो संयुक्त सेसन गणना पूरा नहँदासम्म र परिणाम सार्वजनिक नगर्दासम्म जारी रहन्छ । चुनावको परिणाम घोषणा गरेपछि जनवरी २० मा सपथग्रहणको कार्यक्रममात्र बाँकी रहन्छ ।

संसदका नयाँ सदस्यहरुले जनवरी ३ मा सपथग्रहण गरिसकेकाले यो सबै प्रकृया नयाँ संसदले गर्नेछ । प्रतिनिधिसभामा डेमोक्र्याट्सको नियन्त्रण रहेको छ भने जर्जियाको चुनावको नतिजा प्रमाणिकरण नभइसक्ने भएकाले सिनेटमा रिपब्लिकनको नियन्त्रण रहेकाले माइक पेन्स नै त्यहाँ हुनेछन् ।

इलेक्टोरल मत गणनाको बेलामा संसदमा कुनै पनि बहस र विवादलाई स्थान दिइदैन । तर परिणाम घोषणा गरिएपछि संसदका सदस्यहरुले आफ्नो भनाई राख्न सक्छन् । कुनै पनि राज्यको परिणामबारेको कुनै असहमति भएमा कम्तीमा एकजना सिनेटर र एकजना प्रतिनिधिसभा सदस्यले हस्ताक्षर गरेर लिखित रुपमा पेश गर्नुपर्छ । हरेक सांसदले एकपटकमात्र बोल्न पाउँछन् भने ५ मिनेटमा आफ्नो भनाई सक्नुपर्छ । २ घण्टापछि बहस समाप्त हुन्छ ।

आजको प्रकृयामा केही रिपब्लिकन सांसदले राष्ट्रपतिमा बाइडेनको जीत अस्वीकार गर्नसक्ने देखिएको छ । जसका कारण सांसदहरुलाई संसदका दुबै सदनमा जो बाइडेनको जीत स्वीकार गर्ने वा नगर्ने भन्ने सन्दर्भमा मतदान गर्नुपर्ने अवस्था आउनसक्नेछ ।

उनीहरुको विरोधले चुनावी नजिता परिवर्तन हुने नदेखिएपनि संसदले बाइडेनको जीतलाई औपचारिकता दिनमा भने केही घण्टा ढिलाई हुनसक्नेछ । त्यस्तो विरोध प्रतिनिधिसभा डेमोक्र्याट्सहरुले अस्वीकार गर्ने निश्चित छ भने सिनेटबाट पनि पारित हुने सम्भावना छैन ।

कुनै पनि राज्यको परिणामबारेको असहमति औपचारिक रुपमा दर्ता भएमा संसदका हरेक सदनमा राज्यको परिणाम अस्वीकार गर्ने वा नगर्ने सन्दर्भमा मतदान हुन्छ । तर अस्वीकार गर्नका लागि दुबै सदनबाट पारित हुनुपर्ने भएकाले त्यस्तो सम्भावना यसपटक शुन्य रहेको छ ।

सन् १८८७ मा इलेक्टोरल गणना ऐन पारित भएदेखि दुईपटक राज्यको चुनावी परिणाममा संसदीय अवरोध भएको छ । तर यस्तो अवरोध भएपनि त्यो या त सिनेटबाट या त हाउसबाट पारित नभएका कारण अर्थहिन बन्यो ।

चुनावी परिणाममा अवरोध ल्याएर बाइडेनलाई राष्ट्रपति हुन नदिने रिपब्लिकनहरुको दीर्घकालिन योजना भएकाले यसपटक पनि यस्तो प्रयास हुनसक्छ । तर दुबै सदनबाट सामान्य बहुमतबाट पारित नभएसम्म त्यस्तो अवरोध अर्थहिन हुनेछ । पार्टी अनुशार मतदान हुँदा पनि रिपब्लिकनहरुले बाइडेनको जीतलाई रोक्न सक्दैनन् ।

हाउसमा डेमोक्र्याट्सको नियन्त्रण भएकाले रिपब्लिकनले ल्याएको अवरोध हाउसबाट पारित हुन सम्भव छैन । सिनेटमा पनि कैयन रिपब्लिकनले बाइडेनलाई राष्ट्रपतिमा निर्वाचित भएको घोषणा गरिसकेकाले त्यहाँबाट पनि त्यस्तो अवरोध पारित हुने सम्भावना कम रहेको छ ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com