ओली र प्रचण्डका सबै आरोपपत्र फिर्ता हुने, भदौ २६ को निर्णयमा फर्किने सहमति
प्रकाशित मिति : पुस १, २०७७ बुधबार
सत्तारुढ नेपाल कम्युनिस्ट पार्टी (नेकपा)का अध्यक्ष एवम् प्रधानमन्त्री केपी शर्मा ओली र कार्यकारी अध्यक्ष पुष्पकमल दाहाल प्रचण्डबीच भदौ २६ गते स्थायी कमिटीले गरेको निर्णयकै आधारमा अघि बढ्ने सहमति भएको छ । प्रधानमन्त्रीको सरकारी निवास बालुवाटारमा बसेको स्थायी कमिटी बैठकमा ओली र दाहालबीच भदौ २६ यताका सबै निर्णय फिर्ता लिने सहमति भएको स्रोतले बताएको छ ।
भदौ २६ मा प्रचण्डले पार्टी र ओलीले सरकार सञ्चालन गर्ने तर एकआपसमा महत्वपूर्ण निर्णय गर्दा समन्वयमा अगाडि बढ्ने सहमति भएको थियो । तर, ओलीले सहमति भंग गरेको भन्दै प्रचण्डले एकल रुपमा २८ कात्तिकको बैठकमा राजनीतिक प्रतिवेदन पेश गरेका थिए ।
त्यसपछि प्रधानमन्त्री ओलीले १३ मंसीरमा जवाफी प्रतिवेदन पेश गरेका थिए । उक्त प्रतिवेदन अध्ययनका लागि स्थायी कमिटीमा ७ दिनको समय दिइएको थियो । यसअघि गत २८ गते बसेको बैठक शोक प्रस्ताव पारित गरेर स्थगित भएको थियो । त्यसपछि आज केही ढिला गरी बैठक बसेको थियो ।
यो पनि :-
अध्यादेश फिर्ता लिन प्रधानमन्त्री ओली सहमत, संसद अधिवेशनको माग पनि फिर्ता गर्ने