न्युयोर्कको ‘चिपोट्ले’मा मुसा आतंक, ४ कर्मचारीलाई टोकेपछि अनिश्चितकालका लागि बन्द
प्रकाशित मिति : मंसिर २५, २०७७ बिहीबार
चारजना कर्मचारीलाई मुसाले टोकेपछि न्युयोर्क सिटीको एउटा चिपोट्ले रेष्टुरेण्ट अनिश्चितकालका लागि बन्द गरिएको छ । वेष्ट १६९ मा रहेको उक्त रेष्टुरेण्टमा मुसाले आतंक मच्याएपछि रेष्टुरेण्ट नै बन्द गर्नुपरेको हो ।
मुसाले कम्प्युटर प्रणालीका तारहरु चपाउनेदेखि काम गर्ने कर्मचारीहरुलाई समेत टोक्ने गर्न थालेका थिए । त्यसपछि त्यहाँ दर्जनौं मुसाहरु मार्ने प्रयत्न समेत गरिएको थियो ।
अन्ततः मुसाका अगाडि हार मानेर रेष्टुरेण्ट नै बन्द गर्नुपर्ने अवस्था आएको छ । चिपोट्लेका प्रमुख कर्पोरेट अधिकारीले छिमेकमा रहेका रेष्टुरेण्टहरु बन्द हुँदा त्यहाँबाट मुसाहरु बढेको आरोप लगाएकी छिन् । ग्राहकको स्वास्थ्य र सुरक्षालाई ध्यानमा राखेर रेष्टुरेण्ट बन्द गरिएको उनले बताएकी छिन् ।
मुसाको समस्या केही महिना अगाडि देखि नै सुरु भएको थियो । केही एभोकाडो र चामलका झोलाहरु मुसाले टोकेको र चपाएको भेटिएपछि मुसाको समस्या सुरु भएको थाहा भएको थियो । पछिल्ला केहीदिनमा कर्मचारीहरु मुसाको आक्रमणको डरले बेसमेन्टमा नै जान छाडेका थिए ।
चिपोट्ले अमेरिकामा फैलिदै गरेको चेन रेष्टुरेण्ट हो । गत जुलाईमा यसका सीईओले अमेरिकामा चिपोट्ले रेष्टुरेण्टहरु दोब्बर बनाउने घोषणा समेत गरेका थिए ।
