कुकुरसँग खेल्दा बाइडेनको खुट्टा मर्कियो, ट्रम्पबाट स्वास्थ्यलाभको कामना
प्रकाशित मिति : मंसिर १४, २०७७ आईतबार
कुकुरसँग खेल्ने क्रममा नवनिर्वाचित अमेरिकी राष्ट्रपति जो बाइडेनको खुट्टा मर्किएको छ । उनले अब केहीदिनसम्म खुट्टालाई सहारा दिन बुट लगाउनुपर्ने जनाइएको छ । आफ्नो कुकुर मेजरसँग खेल्ने क्रममा चिप्लिएर खुट्टा मर्किएको जनाइएको छ ।
७८ बर्षका बाइडेन शनिबार कुकुरसँग खेल्ने क्रममा चिप्लिदा गोलीगाँठोको हड्डीमा चोट लागेको हो । उनलाई आइतबार दिउसो ४ बजेतिर अर्थोपेडिक विशेषज्ञसमक्ष लगिएको थियो ।
प्रारम्भिक एक्स रेका क्रममा कुनै चोट नदेखिएपनि उनको दाहिने खुट्टा मर्किएको देखिएको थियो । पछि सीटी स्क्यान गर्दा एकदमै सानो फ्रयाक्चर देखिएको थियो ।
यसैबीच बाइडेनसँग पराजित डोनाल्ड ट्रम्पले ट्वीटरमार्फत बाइडेनको स्वास्थ्यलाभको कामना गरेका छन् । खुट्टा चेक गराउन गएको भिडियो रिट्वीट गर्दै ट्रम्पले स्वास्थ्यलाभको कामना गरेका हुन् ।
Get well soon! https://t.co/B0seiO84ld
— Donald J. Trump (@realDonaldTrump) November 30, 2020
जो बाइडेन ४६ औं राष्ट्रपतिका रुपमा सपथ लिने अमेरिकाका सबैभन्दा बढी उमेरका अमेरिकी राष्ट्रपति हुनेछन् । बाइडेन दम्पत्तिले मेजर नामको जर्मन सेफर्ड कुकुर सन् २०१८ मा डेलावर ह्युमन एसोसिएसनबाट एडप्ट गरेका हुन् । यो कुकुर ह्वाइटमा बस्ने पहिलो आश्रय दिइएको कुकुर हुनेछ ।
बाइडेन दम्पत्तिले अर्को जर्मन सेफर्ड कुकुर च्याम्पसलाई पनि ह्वाइट हाउसमा ल्याउने भएका छन् । र उनीहरुले एउटा बिरालो पनि पाल्ने जनाइएको छ ।