कोरोना संक्रमण बढेपछि भोलि विहानदेखि न्युजर्सीमा नयाँ प्रतिबन्ध
प्रकाशित मिति : मंसिर १, २०७७ सोमबार
कोरोना संक्रमण बढेपछि भोलि विहानदेखि न्युजर्सीमा नयाँ प्रतिबन्धहरुको घोषणा गरिएको छ । भोलि विहान ६ बजेदेखि लागु हुनेगरी न्युजर्सीमा घरभित्रका भोजभतेरहरुमा १० जनाभन्दा बढी जम्मा हुन नपाइने भएको छ । यसअगाडि २५ जनासम्म जम्मा हुन पाइने नियम रहेको थियो ।
त्यस्तै घरबाहिर हुने जमघटहरुमा १५० भन्दा धेरै जम्मा हुन नपाइने भएको छ । यसअगाडि ५ सय भन्दा धेरै जम्मा हुन नपाइने नियम रहेको थियो । न्युजर्सीमा केहीदिन यता संक्रमणदर उच्च बनेपछि गभर्नर फिल मर्फीले नयाँ प्रतिबन्धको घोषणा गरेका हुन् ।
थ्यांक्सगिभिङ नजिकिदै गर्दा नयाँ प्रतिबन्धको घोषणा गरिएको हो । गभर्नर मर्फीले महामारी अझै खराब भइरहेको र अझै खराब हुने चेतावनी दिएका छन् । रेष्टुरेण्टभित्र २५ प्रतिशत क्षमतामा खानाखान सकिने नियममा भने कुनै परिवर्तन गरिएको छैन ।
त्यस्तै विवाह, दाहसंस्कार, चलचित्रभवन, प्रस्तुती, धार्मिक सेवाहरु, राजनीतिक कार्यक्रम लगायतमा कार्यक्रम स्थलको २५ प्रतिशत क्षमतामा मात्र उपस्थीत हुन सकिनेछ । अधितकत १५० भन्दा बढी भने जम्मा हुन पाइनेछैन । तर घरभित्र हुने पार्टीहरुमा भने १० जनाभन्दा धेरै जम्मा हुन पाइनेछैन ।
न्युजर्सीमा सप्ताहन्तभर थप झण्डै ९ हजारमा कोरोना संक्रमण पुष्टी भएको छ । शनिबारमात्र ४ हजार ३ सय ९५ र आइतबार ४ हजार ५ सय ४० जनामा संक्रमण पुष्टी भएको थियो । अहिले न्युजर्सीमा दैनिक ५५ हजारसम्मको परीक्षण क्षमता रहेको छ ।
कोरोनाबिरुद्धको मोडेर्ना भ्याक्सिन ९४ दशमलव ५ प्रतिशत प्रभावकारी
यसैबीच कोरोनाबिरुद्धको अमेरिकन कम्पनी मोडेर्नाले परीक्षण गरिरहेको बहुप्रतिक्षित भ्याक्सिन ९४ दशमलव ५ प्रतिशत प्रभावकारी रहेको तथ्यांक सार्वजनिक गरिएको छ । आज कम्पनीले सार्वजनिक गरेको तथ्यांक अनुशार मोडेर्नाको भ्याक्सिनको प्रभावकारिता निकै उत्साहजनक पाइएको छ ।
यसअगाडि अमेरिकन कम्पनी फाइजरले जर्मन कम्पनी बायो एनटेक सँग मिलेर बनाएको भ्याक्सिन ९० प्रतिशतभन्दा धेरै प्रभावकारी रहेको तथ्यांक सार्वजनिक भएको थियो । मोडेर्नाको यो रिपोर्टले कोरोनाको महामारीमा ग्रस्त विश्वमा कोरोनाबिरुद्ध लड्नसक्ने आशाको संचार गरेको छ ।
अमेरिकाका बरिष्ठ सरुवारोग विशेषज्ञ डाक्टर एन्थोनी फाउचीले यो परिणाम निकै उत्साहजनक भएको बताएका छन् । मोडेर्नाका प्रमुख मेडिकल अफिसर डाक्टर ताल ज्याक्सले यो आफ्नो करिअरकै सबैभन्दा महान क्षण भएको बताएका छन् ।
डिसेम्बरको दोश्रो सातादेखि अमेरिकामा सर्वसाधारणमा भ्याक्सिन लगाउन सुरु हुनसक्ने डाक्टर फाउचीले बताएका छन् । सुरुमा अति जोखिममा रहेकाहरुलाई भ्याक्सिन दिइने र त्यसपछि सबैका लागि उपलब्ध हुने उनको भनाई छ ।
मोडेर्नाको परीक्षणमा १५ हजारलाई सलाइनको सट दिइएकोमा ९० जनामा संक्रमण देखिएको थियो भने ११ जना सिकिस्त भएका थिए । त्यस्तै अरु १५ हजारलाई वास्तविक भ्याक्सिन नै दिइएकोमा ५ जनामा सामान्य संक्रमण देखिएको थियो भने कोहीपनि सिकिस्त भएनन् ।
भ्याक्सिनको कुनै गम्भिर साइड इफेक्ट नभएको बताइएको छ । एकदम थोरैलाई सामान्य टाउको दुख्ने र शरिर दुख्ने भएको जनाइएको छ ।
मोर्डेनाले भ्याक्सिनको प्रयोगको स्वीकृतिका लागि अमेरिकन खाद्य तथा औषधी प्रशासनसमक्ष यसैमहिना आवेदन दिने भएको छ । सबै तथ्यांकहरु एकीकृत गरेपछि आवेदन दिइनेछ भने विगत दुईमहिनाको तथ्यांक हेरेर एफडीएले स्वीकृति प्रदान गर्नेछ ।
मोडेर्ना र फाइजरको भ्याक्सिन एउटै प्रविधिबाट बनाइएको भएतापनि वितरणमा मोडेर्नाको भ्याक्सिन अझ सहज हुने जनाइएको छ । फाइजरको भ्याक्सिन माइनस ७५ डिग्री सेल्सियस चिसो तापक्रममा राख्नुपर्नेछ भने मोडेर्नाको भ्याक्सिन माइनस २० डिग्री सेल्सियस चिसो तापक्रममा राख्नुपर्नेछ ।
फाइजरको भ्याक्सिन राख्नका लागि विशेष फ्रिजर आवश्यक हुने भएपनि मोडेर्नाको भ्याक्सिन अहिले नै उपलब्ध फ्रिजरहरुमा राख्न सकिने भएकाले सहज तरिकाले वितरण गर्न सकिने अपेक्षा गरिएको छ ।