कामदार भिसाको लोटरी प्रणाली बन्द गर्ने ट्रम्प प्रशासनको प्रस्ताव
प्रकाशित मिति : कार्तिक १३, २०७७ बिहीबार
ट्रम्प प्रशासनले अमेरिकामा कामदार भिसा एच वान बीको लोटरी बन्द गर्ने प्रस्ताव ल्याएको छ । लोटरीको सट्टा अधिकतम तलब भएका जागिरहरुलाई प्राथमिकता दिनेगरी कामदार भिसाका आवेदकहरु छनौट गर्ने प्रस्तावमा उल्लेख गरिएको छ ।
बुधबार घोषणा गरिएको यो प्रस्ताव फेडरल रजिष्टरमा प्रकाशित हुनेछ । उक्त प्रस्तावमा ३० दिनको कमेन्ट अवधि दिइने भएको छ । त्यस्तै सुचना संकलनको प्रयोजनका लागि ६० दिनको कमेन्ट अवधि दिइएको छ । यो नियम प्रस्तावित नियम भएकाले तत्कालै लागु हुनेछैन । कमेन्ट अवधि समाप्त भएपछि अन्तिम नियम प्रकाशित हुनसक्नेछ ।
फेडरल रजिस्टरमा प्रकाशित गरिने प्रस्तावित नियम यस्तो छ ।
अहिलेको छनौट प्रणाली लोटरी प्रणालीबाट भएकाले बढी तलब दिने विजनेशहरुलाई निकै मुस्किल भएको डिपार्टमेन्ट अफ होमल्याण्ड सेक्युरिटीका सेक्रेटरी केन कुचिनेलीले बताएका छन् । अहिलेको प्रणालीका कारण अमेरिकी कामदारलाई आघात पुगेको उनको भनाई छ ।
अमेरिकी सरकारले हरेक बर्ष ८५ हजारलाई कामदारभिसा एचवान बी प्रदान गर्दै आएको छ । त्यसका लागि सरकारले लोटरी प्रणाली गर्दै आएको छ । गत मार्चदेखि भने विद्युतीय रुपमा अनलाइनबाटै दर्ता गर्न सकिने प्रणालीको सुरुवात गरिएको थियो । .
अहिलेको यो प्रस्तावित नियम ट्रम्पको कार्यकाल सकिनु अगाडि नै कार्यान्वयनमा ल्याउन खोजिएको छ । आगामी मार्च भन्दा अगाडि नै यो नियम कार्यान्वयनमा ल्याइने जनाइएको छ । आगामी चुनावमा जसले जितेपनि डोनाल्ड ट्रम्पको यो कार्यकाल आगामी जनवरी २० सम्म कायम रहनेछ । ट्रम्पले जितेका ट्रम्प प्रशासनले सुरु गरेका प्रस्तावित नियमहरु कार्यान्वयन गर्नेछन् भने जो बाइडेनले जितेमा ट्रम्पले ल्याएका नीतिहरु उल्टाउने सम्भावना रहेको छ ।