चुनाव अगाडि राहत प्याकेजको सम्भावना समाप्त, एकअर्कालाई आरोप प्रत्यारोप
प्रकाशित मिति : कार्तिक ११, २०७७ मंगलबार
चुनाव अगाडि कोरोना सम्बन्धि राहत प्याकेजको सम्भावना समाप्त भएको छ । त्यसका लागि डेमोक्र्याट्स र ह्वाइटहाउसले एकअर्कालाई आरोप लगाएका छन् । हाउस स्पीकर न्यान्सी पेलोसीले चुनाव अगाडि दोश्रो चरणको राहत प्याकेज पारित गर्न असफल भएको आरोप ह्वाइटहाउसलाई लगाएकी छिन् ।
डेमोक्रेटिक सांसदहरुलाई लेखेको पत्रमा पेलोसीले ह्वाइट हाउस दुर्घटनाका कारण होइन, निर्णयकै कारण दोश्रो चरणको राहत प्याकेज पारित गर्न दयनिय रुपमा असफल भएको बताएकी छिन् ।
पेलोसी र युएस ट्रेजरी सेक्रेटरी स्टेभन मन्चिनबीच राहत प्याकेजबारे विभिन्न चरणका वार्ताहरु भएका थिए । तर वार्ता निष्कर्षमा पुग्न भने सकेन । पेलोसीले सहमतिका लागि गतसाताको डेडलाइन राखेपनि त्यसपछि भएका प्रयत्नहरुसमेत निष्कर्षमा पुग्न सकेनन् ।
यसैबीच राहत प्याकेज पारित हुन नसकेकोमा राष्ट्रपति डोनाल्ड ट्रम्पले पेलोसीलाई आरोप लगाएका छन् । उनले चुनावपछि ठूलै राहत प्याकेज पारित गर्ने आश्वासन समेत दिएका छन् । चुनावपछि अहिलेसम्म देखेकोमा सबैभन्दा राम्रो प्याकेज पारित हुने ट्रम्पले बताएका छन् ।
अमेरिकी चुनाव आउन अब झण्डै एकसाता बाँकी रहेको छ । तर कोरोनाको महामारीका कारण यस पटक चुनावका नतिजाहरु आउन कैयन दिन लाग्ने अनुमान गरिएको छ । संसदबाट राहत प्याकेज पारित हुन नसक्दा अमेरिकनहरु गरिबीतिर धकेलिएका छन् ।