मेडिकेड र मेडिकेयरले पनि कोरोना भ्याक्सिन कभर गर्ने घोषणा गर्दै ट्रम्प प्रशासन


प्रकाशित मिति : कार्तिक ११, २०७७ मंगलबार

ट्रम्प प्रशासनले कोरोनाबिरुद्धको भ्याक्सिन मेडिकेड र मेडिकेयरले पनि कभर गर्ने घोषणाको तयारी गरेको छ । अर्थात् यो घोषणापछि मेडिकेड र मेडिकेयर स्वास्थ्यविमा हुनेहरुले पनि निशुल्क कोरोनाबिरुद्धको भ्याक्सिन लगाउन पाउनेछन् ।

वर्तमान नीति अन्तरगत भने कोरोनाबिरुद्धको भ्याक्सिनलाई मेडिकेड र मेडिकेयरले कभर गर्दैन । तर ट्रम्प प्रशासनले नयाँ नीति घोषणा गरेमा अमेरिकाको खाद्य तथा औषधी प्रशासनले आपतकालिन स्वीकृति प्रदान गर्ने योजना रहेको कोरोनाबिरुद्धको भ्याक्सिनको लागि मेडिकेयर र मेडिकेड हुनेहरुले पनि अतिरिक्त शुल्क तिर्नुपर्दैन ।

अमेरिकामा ६५ बर्ष पुगेका र कम उमेरका अपांगता भएकाहरुलाई पनि मेडिकेयरको सुविधा दिइदै आएको छ । यो सन् १९६६ मा सुरु भएको राष्ट्रिय स्वास्थ्य विमा कार्यक्रम हो । त्यस्तै कम आम्दानी हुनेहरुले अमेरिकामा मेडिकेडको सुविधा प्राप्त गर्दै आएका छन् ।

ट्रम्प प्रशासनले कोरोना भ्याक्सिनलाई मेडिकेड र मेडिकेयरले कभर गर्नेगरी मंगलबार वा बुधबार नीति घोषणा गर्ने जनाइएको छ । अमेरिकामा कम्तीमा २ वटा भ्याक्सिन निर्माण कम्पनीले यो बर्षको अन्त्य अगाडि नै भ्याक्सिनको आपतकालिन स्वीकृतिका लागि एफडीए समक्ष आवेदन दिने योजना बनाएका छन् ।

आपतकालिन अनुमति लिएपछि मुलुकमा संकटकालको अवस्था रहेको बेलामा भ्याक्सिनको वितरण गर्न सकिन्छ । त्यसका लागि पूर्ण अनुमतिमा जस्तो सबै र धेरै मापदण्डहरु पूरा गर्नु पर्दैन । अमेरिकामा फाइजर र मोडेर्नाले भ्याक्सिन निर्माणको काम दु्रत गतिमा गरिरहेका छन् ।

अहिले विश्वमा झण्डै १० वटा भ्याक्सिनहरु तेश्रो चरणको क्लीनिकल परीक्षणका क्रममा रहेका छन् । बेलायतको आष्ट्राजेनेका र बेल्जियमको जोन्सन एण्ड जोन्सनले पनि तेश्रो चरणको क्लीनिकल परीक्षण जारी गरेका छन् ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com