सर्वोच्चको न्यायाधिसमा ब्यारेटको नियुक्तीबारे सिनेटमा भोलि अन्तिम मतदान
प्रकाशित मिति : कार्तिक ९, २०७७ आईतबार
अमेरिकी राष्ट्रपति डोनाल्ड ट्रम्पबाट सर्वोच्च अदालतको न्यायाधिसमा सिफारिस गरिएकी एमी कोनी ब्यारेटको नियुक्तीबारे भोलि सोमबार सिनेटमा अन्तिम मतदान हुने भएको छ । आइतबार ५१ ४८ मतमार्फत ब्यारेटको नियुक्तीबारे सिनेटमा अन्तिम मतदानका लागि अगाडि बढाइएको हो ।
न्यायिक समिति समक्षको सुनुवाईपछि ब्यारेटको नियुक्तीका लागि अन्तिम मतदान हुने भएको हो । सिनेटका रिपब्लिकनहरु र ह्वाइटहाउसले नोभेम्बर ३ अगाडि नै ब्यारेटको नियुक्ती सुनिश्चित गर्ने योजना बनाएका छन् । न्यायाधिस रुथ बेडर गिन्सबर्गको निधनपछि रिक्त स्थानमा ब्यारेटको नाम सिफारिस गरिएको हो ।
पुनरावेदन अदालतमा रहेकी कन्जरभेटिभ न्यायाधिस ब्यारेटको नाम सिफारिस गर्दै ट्रम्पले गौरवपूर्ण क्षण भएको वताएका थिए । साथै ब्यारेट विशाल बौद्धिकता भएकी महिला भएको ट्रम्पले टिप्पणी गरेका थिए ।
सिनेटमा सामान्य बहुमत प्राप्त भएको खण्डमा ब्यारेट अमेरिकाको सर्वोच्च अदालतको न्यायाधिसमा नियुक्त हुनेछिन् । उनको नियुक्तीपछि सर्वोच्चमा रिपब्लिकन नियुक्त न्यायाधिसको संख्या ६ र डेमोक्र्याट्स नियुक्त न्यायाधिसको संख्या ३ पुग्नेछ ।
४८ बर्षकी ब्यारेटलाई सेभेन्थ सर्किट कोर्टमा डोनाल्ड ट्रम्पले नै सिफारिस गरेका थिए । पुनरावेदनमा सन् २०१७ को अक्टोबर ३१ मा उनको नियुक्ती सिनेटले पारित गरेको थियो ।
सन् २०१६ मा न्यायाधिस एन्टोनिन स्कालियाको निधन फरबरीमा हुँदा तत्कालिन राष्ट्रपति बराक ओबामाले गाल्र्याण्डलाई नोमिनेट गरेका थिए । तर सिनेटले चुनाव अगाडि न्यायाधिसको नाममा मतदान गरेन । पछि डोनाल्ड ट्रम्प नियुक्त भइसकेपछि निल गोर्सचलाई नियुक्त गरेका थिए भने सिनेटले पनि उनको नाम पारित गरेको थियो ।
बिल क्लिन्टनले गेन्सबर्गलाई सन् १९९३ मा सर्वोच्च अदालतको न्यायाधिस नियुक्त गर्दा पनि झण्डै ७० दिन लागेको थियो ।
यसअगाडि सन् २०१८ मा रिटायर्ड भएका एन्थोनी केनेडीको स्थानमा पनि डोनाल्ड ट्रम्पले नै न्यायाधिस नियुक्त गरेका थिए । एन्थोनी केनेडीलाई रोनाल्ड रेगनले नियुक्त गरेपनि उनी सधै कन्जरभेटिकका पक्षमा भने उभिएका थिएनन् । बराक ओबामाको कार्यकालमा भने सर्वोच्च अदालतमा २ जना न्यायाधिस नोमिनेट गरेका थिए, जसमा दुबैजना महिला थिए ।