हतियार र बिष्फोटकसहित पक्राउ १९ बर्षीयले बाइडेनको हत्याको योजना बनाएको खुलासा
प्रकाशित मिति : कार्तिक ७, २०७७ शुक्रबार
हतियार र बिष्फोटकसहित पक्राउ परेका १९ बर्षका व्यक्तिले अमेरिकी राष्ट्रपति उम्मेदवार जो बाइडेनको हत्याको योजना बनाएको खुलासा भएको छ । अलेक्जेण्डर हिलेल ट्रिज्म्यान नामका ती व्यक्ति डेलाबरमा रहेको जो बाइडेनको घरको ४ माइलको आसपास पुगेक थिए ।
गत मे महिनामा ती व्यक्तिलाई ५ वटा बन्दुक, भ्यानमा केही बिष्फोटक पदार्थ र ५ लाख डलर नगदसहित पक्राउ गरिएको थियो । उनले बाइडेनको हत्या गर्ने योजना बनाएको भने अहिले अदालती कागजातबाट खुलासा भएको छ । चाइल्ड पोर्नोग्राफी सामाग्री राखेको र प्रशारण गरेको समेत आरोप लागेका उनलाई हिराशतमा राखिएको छ ।
ती व्यक्तिलाई नर्थ क्यारोलिनामा पक्राउ गरिएको हो । उनले केही अगाडि न्यु ह्याम्पशायरमा एआर १५ राइफल किनेको जनाइएको छ । मेम शेयर गर्ने वेवसाइट आइफनीमा उनले जो बाइडेनको हत्या गर्ने कुरा समेत अप्रिल १५ मा शेयर गरेको अदालती आदेशमा उल्लेख गरिएको छ ।
सेप्टेम्बरमा उनलाई चाइल्ड पोर्नोग्राफीको मात्र अभियोग लगाइएपनि अक्टोबरमा उनले बाइडेनको हत्या समेत योजना बनाएको अनुसन्धानबाट खुलेको थियो । माचदेखि मे को बीचमा ती व्यक्तिले बाइडेनको घरको ठेगाना इन्टरनेटमा खोजेको र डेलावरको बन्दुक सम्बन्धि कानुनबारे खोजेको पाइएको छ ।
उनले नाइट भिजन गगलबारे सर्च गर्नुका साथै बाइडेनको घरभन्दा ४ माइल नजिकको क्याफेमा पुगेको समेत खुलासा भएको छ । साथै उनले चेकलिष्ट बनाएर मृत्युदण्ड भन्ने शब्दसमेत लेखेको भेटिएको छ । विगतका भने ती व्यक्ति कुनै आपराधिक पृष्ठभूमि देखिएको छैन ।
बैंकको पार्किङ लटमा छाडिएको उनको गाडी प्रहरीले नियन्त्रणमा लिंदा गाडीमा बिष्फोटकहरु बनाउने, अस्थायी हतियार निर्माण गर्ने र इस्लामका बारेमा केही पुस्तकहरु भेटिएका थिए । गाडीमा राइफलहरु, बिष्फोटक र ५ लाख ९ हजार अमेरिकी डलर समे बरामत भएको थियो । पछि ट्रिज्म्यान आफ्नो गाडी खोज्दै बैंकको पार्किङ लटमा आएको जनाइएको छ ।
बैंकका कर्मचारीले प्रहरीलाई खबर गरेपछि तुरुन्तै प्रहरी आएर ट्रिज्म्यानलाई पक्राउ गरेको थियो । ट्रिज्म्यानको होण्डमा अरु दुईवटा राइफलहरुसमेत भेटिएका थिए । उनले तीनवटा राज्यको ड्राइभर लाइसेन्स बोकेको समेत पाइएको थियो ।