भिजिटर भिसाका २ योग्यता हटाइदै, पारिश्रमिक लिने कलाकार र खेलाडी भिजिटर भिसामा आउन नपाउने
प्रकाशित मिति : कार्तिक ४, २०७७ मंगलबार
अमेरिकी सरकारको विदेश मन्त्रालयले भिजिटर भिसा बी वानका २ वटा योग्यताहरु हटाउने प्रस्तावित नियम भोलि अक्टोबर २१ मा फेडरल रजिस्टरमा प्रकाशित गर्ने भएको छ । यो नियमका लागि ६० दिनको कमेन्ट अवधि दिइनेछ । त्यसपछिमात्र अन्तिम नियम प्रकाशित गरिनेछ ।
पुराना दुईवटा वाक्यका कारण कामदार भिसा एचको सट्टामा भिजिटर र विजनेश भिसा बी वान प्रयोग भएको ठहर गर्दै अमेरिकी विदेशमन्त्रालयले योग्यताका ती दुई वाक्यहरु हटाउन लागेको हो । बी वान भिसा ब्यापार वा रमाइलोका लागि अमेरिका आउने अस्थायी भिजिटरहरुलाई प्रदान गरिदै आएको छ ।
फेडरल रजिस्टरमा नियमको पूर्ण पाठ यहाँ पढ्नुहोला ।
विगत लामोसमयदेखि अभ्यास भइरहेको नीति अन्तरगत कामदार भिसा एचवान बीका सेवा अस्थायी रुपमा संचालनका लागि विदेशमै तलब बुझ्ने व्यक्ति समेत बी वान भिसामा अमेरिका आउनसक्ने प्रावधान रहेको छ । तर नयाँ नियम लागु भएपछि भने एचवानबी प्रयोजनका लागि कोही व्यक्ति बी वान भिसामा अमेरिका आउन पाउनेछैन ।
कामदारभिसा एचको सट्टामा प्रदान गरिएका बी भिसाका सन्दर्भमा नोटमा बीआईएलओएच लेखिएको हुन्छ । नयाँ नियम लागु भएपछि उक्त नोटसहित पहिले नै दिइएका बी वान भिसा स्वत खारेज भने हुनेछैनन् । अमेरिकी विदेशमन्त्रालयले पहिले नै जारी भएका भिसा खारेजीका लागि कुनै कदम पनि चाल्नेछैन ।
तर त्यस्ता व्यक्तिको पोर्ट अफ इन्ट्रीमा पुनरावलोकन भने हुनसक्नेछ । उनीहरुलाई अमेरिकाको प्रचलित ज्याला भुक्तानी गरिने सन्दर्भमा पोर्ट अफ इन्ट्रीमा सोधपुछ भने हुनसक्नेछ ।
त्यस्तै अमेरिकामा कलाकार वा खेलाडीहरुले रकम लिनेगरी आफ्नो प्रस्तुती देखाउनका लागि पनि बी वान भिसामा आउन पाउनेछैनन् । अहिलेसम्म कतिपय कलाकार वा खेलाडीहरुलाई रकम लिनेगरी आफ्नो प्रस्तुती देखाउन बी वान भिसामा आउने छुट समेत दिइएकोमा नयाँ नियम लागु भएपनि उनीहरु पी वा ओ श्रेणीको भिसामा मात्र आउन पाउनेछन् ।
यसबारे विदेश मामला सम्बन्धि नीतिमा केही अपवादहरु भने अझै पनि रहेका छन् ।
सामान्यतया विदेशमा नै काम गरिरहेका व्यक्तिले बैध ब्यापारिक गतिविधि गर्नका लागि अमेरिका आउनुपरेमा बी वान भिसा प्राप्त गर्ने नियम रहेको छ । यो भिसामा अमेरिकामा आएर जागिर खान अनुमति छैन । तर विदेशमै तलब लिएर केही कामदार भिसाका सेवाहरु अस्थायी रुपमा प्रदान गर्न भने छुट दिइदै आएको थियो ।