राहत प्याकेजबारेको ह्वाइटहाउससँगको आजको वार्ता पनि निष्कर्षमा पुगेन, भोलि पुन: वार्ता


प्रकाशित मिति : कार्तिक ४, २०७७ मंगलबार

हाउस स्पीकर न्यान्सी पेलोसीले चुनाव अगाडि राहत प्याकेज पारित गर्नका लागि सहमति कायम गर्न आज मंगलबारसम्मको डेडलाइन तोकेपनि आजको वार्ता निष्कर्षमा पुग्न सकेन । पेलासी र ट्रेजरी सेक्रेटरी स्टेभन मन्चिनबीच आज ४५ मिनेट कुराकानी भएको छ । वार्ता सकारात्मक भएपनि टुंगोमा नपुगेपछि भोलि बुधबारपनि कुराकानी हुने भएको छ ।

आजको कुराकानी निकै सकारात्मक भएको तर निचोडमा पुग्नका लागि अझै समय लाग्ने ह्वाइटहाउसका चिफ अफ स्टाफ मार्क मेडोजले बताएका छन् । भोलि र पर्सीको कुराकानीपछि शुक्रबारसम्म कुनै प्रकारको सहमति कायम हुनसक्ने उनले बताएका छन् । अब अमेरिकी चुनाव आउन २ सातामात्र बाँकी रहेकाले चुनाव अगाडि प्याकेज पारित गर्नका लागि संसदसमक्ष निकै कम समय बाँकी रहेको छ ।

आजको कुराकानीको क्रममा ह्वाइटहाउसले १ दशमलव ९ ट्रिलियन डलरसम्मको प्याकेजका लागि औपचारिक सहमति जनाएको छ । तर डेमोक्र्याट्सहरु भने २ दशमलव २ ट्रिलियनको राहत प्याकेजका पक्षमा रहेका छन् । राहत प्याकेज पारित हुननसक्दा कैयन अमेरिकनहरु गरिबीतिर धकेलिएका छन् ।

यसैबीच  अमेरिकी राष्ट्रपति डोनाल्ड ट्रम्पले तुरुन्त राहत प्याकेज पारित गर्नका लागि सांसदहरुलाई आव्हान गरेका छन् । उनले आफूले डेमोक्र्याट्सले ल्याएको २ दशमलव २ ट्रिलियनको भन्दा पनि ठूलो राहत प्याकेज समर्थन गर्ने घोषणा गरेका छन् ।

आफू डेमोक्र्याट्सको भन्दा पनि ठूलो राहत प्याकेजका पक्षमा रहेको उनले बताएका छन् । हाउस स्पीकर न्यान्सी पेलोसी र ट्रेजरी सेक्रेटरी स्टेभन मन्चिनबीच सहमतिका लागि वार्ताहरु भइरहदा ट्रम्पको यो भनाई आएको हो । सिनेटमा रिपब्लिकन नेताहरुले ह्वाइट हाउस र हाउस स्पीकरबीच सहमति भएमा आफू त्यो मान्न तयार हुने बताएका थिए ।

यद्यपी सिनेटमा रिपब्लिकन सांसदहरु भने ठूलो राहत प्याकेजको पक्षमा छैनन् । मन्चिन र पेलोसीबीच सहमति भएमा सिनेटमा रिपब्लिकनहरुपनि त्यसमा सहमत हुने ट्रम्पले अपेक्षा गरेका छन् । सबै रिपब्लिकनहरु आफूसँग सहमत नभएपनि उनीहरुले राहत प्याकेजमा सहमति जनाउने ट्रम्पको भनाई छ ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com