अब संक्रमण दर उच्च रहेका ४३ राज्यबाट न्युयोर्क आउँदा क्वारेन्टीन अनिवार्य
प्रकाशित मिति : कार्तिक ४, २०७७ मंगलबार
अब संक्रमण दर उच्च रहेका ४३ राज्यबाट न्युयोर्क आउँदा १४ दिन अनिवार्य क्वारेन्टीनमा बस्नुपर्ने भएको छ । मंगलबार न्युयोर्कले मेरिल्याण्ड र एरिजोनालाई पनि सुचीमा थपेको छ ।
कुनै बेला कोरोना महामारीको इपीसेन्टर रहेको न्युयोर्कमा परीक्षण गरिएकाहरुमध्येमा संक्रमणदर १ दशमलव ३ प्रतिशत रहेको छ । न्युयोर्कको रेडजोनमा २ दशमलव ९ प्रतिशत कोरोना संक्रमणदर रहेपनि मोहक भ्यालीमा भने शुन्य दशमलव ४ प्रतिशतमात्र संक्रमणदर रहेको छ ।
मापदण्ड अनुशार कनेक्टिकट, न्युजर्सी र पेन्सिलभेनियापनि सुचीमा पर्ने भएतापनि ती राज्यबाट आउनलेलाई व्यवहारिक रुपमा क्वारेन्टीन अनिवार्य गर्न सम्भव नभएको गभर्नर एन्ड्रयु कुमोले बताएका छन् । यी राज्यहरुसँगको आवतजावत तीब्र भएकाले क्यारेन्टीन सम्भव नभएपनि अत्यावश्यक बाहेकका अन्य यात्रा नगर्न कुमोले सुझाव दिएका छन् ।
न्युयोर्क सिटीमा कोरोना संक्रमणदर १ दशमलव ३ प्रतिशत रहेको छ भने राजधानी अल्बानीमा शुन्य दशमलव ८ प्रतिशत रहेको छ । लङ आइल्याण्डमा संक्रमणदर शुन्य दशमलव ९ प्रतिशत रहेको छ । सेन्ट्रल न्युयोर्कको संक्रमणदर २ दशमलव १ प्रतिशत रहेपनि कोर्टल्याण्ड काउन्टी एक्लैमा संक्रमणदर ७ प्रतिशतहुँदा अन्य क्षेत्रको समग्र दर उच्च देखिएको हो ।
यसैबीच गभर्नर कुमोले कमर्शियल रुपमा भाडामा दिइएकाहरुलाई निकाला गर्नमा जनवरी १ सम्मका लागि रोक लगाएका छन् । आवासीय भाडावाललाई पनि जनवरी १ सम्म घरनिकाला गर्न रोक लगाइएकोमा त्यसमा एकरुपता कायम गरिएको हो ।
न्युयोर्क आउँदा अनिवार्य क्वारेन्टीमा बस्नुपर्ने राज्यहरुको सुची यहाँ हेर्नुहोला ।