डेमोक्र्याट्सले ल्याएको २.२ ट्रिलियनको भन्दा ठूलो राहत प्याकेज पारित गर्न ट्रम्पको दबाब
प्रकाशित मिति : कार्तिक ४, २०७७ मंगलबार
अमेरिकी राष्ट्रपति डोनाल्ड ट्रम्पले तुरुन्त राहत प्याकेज पारित गर्नका लागि सांसदहरुलाई आव्हान गरेका छन् । उनले आफूले डेमोक्र्याट्सले ल्याएको २ दशमलव २ ट्रिलियनको भन्दा पनि ठूलो राहत प्याकेज समर्थन गर्ने घोषणा गरेका छन् ।
आफू डेमोक्र्याट्सको भन्दा पनि ठूलो राहत प्याकेजका पक्षमा रहेको उनले बताएका छन् । हाउस स्पीकर न्यान्सी पेलोसी र ट्रेजरी सेक्रेटरी स्टेभन मन्चिनबीच सहमतिका लागि वार्ताहरु भइरहदा ट्रम्पको यो भनाई आएको हो । सिनेटमा रिपब्लिकन नेताहरुले ह्वाइट हाउस र हाउस स्पीकरबीच सहमति भएमा आफू त्यो मान्न तयार हुने बताएका थिए ।
यद्यपी सिनेटमा रिपब्लिकन सांसदहरु भने ठूलो राहत प्याकेजको पक्षमा छैनन् । अमेरिकी राष्ट्रपति चुनाव आउन २ सातामात्र बाँकी रहँदा चुनाव अगाडि राहत प्याकेज पारित गर्न सहमतिका लागि आज मंगलबारको डेडलाइन तय गरिएको छ ।
ह्वाइटहाउसले १ दशमलव ८ ट्रिलियनको राहत प्याकेज प्रस्ताव गरेको छ भने पेलोसीले २ दशमलव २ ट्रिलियनका लागि दवाव दिइरहेकी छिन् । यसैबीच रिपब्लिकनहरुले पेचेक प्रोट्रेक्सन प्रोग्रामबारेको एउटा बिल मंगलबार सिनेटमा प्रस्तुत गर्दैछन् ।
मन्चिन र पेलोसीबीच सहमति भएमा सिनेटमा रिपब्लिकनहरुपनि त्यसमा सहमत हुने ट्रम्पले अपेक्षा गरेका छन् । सबै रिपब्लिकनहरु आफूसँग सहमत नभएपनि उनीहरुले राहत प्याकेजमा सहमति जनाउने ट्रम्पको भनाई छ ।
